काठमाडौं(हाम्रो खेलकुद) – थाइल्याण्डले नेदरल्याण्ड्सविरुद्ध टि ट्वान्टी आई सिरिजको खेलमा मध्यम योगफल तयार गरेको छ ।

नेदरल्याण्ड्सको सिरिजको अन्तिम खेलमा थाइल्याण्डले १ सय १० रनको लक्ष्य दिएको हो । थाइल्याण्डले निर्धारित २० ओभरमा ५ विकेट गुमाएर १ सय ९ रनको मध्यम योगफल तयार गर्यो ।

थाइल्याण्डका लागि नान्नाफाट चैहान नट आउट रहँदै सर्वाधिक ३६ रन बनाइन् । उनले ४६ बलमा ४ चौका र १ छक्का प्रहार गरिन् ।

पाँचौ विकेटका लागि चैहान र चानिदा सुत्थीरुआंगले ६६ रनको साझेदारी गरेका थिए । सुत्थीरुआंगले २८ बलमा ४ चौकाको सहयोगमा ३२ रन जोडिन् । कप्तान नारुइमोल चाइवाईले २६ बलमा १५ रन जोड्दा सुवानान खियाओतोले नट आउट १० रन जोडिन् ।

थाइल्याण्डले पछिल्लो ५ ओभरमा ४६ रन जोडेको थियो । नेदरल्याण्ड्सका लागि आइरिस विलिङले ३ तथा हेटर सिगर्सले २ विकेट लिइन् । सिरिजमा थाइल्याण्ड पाँचौ जित निकाल्दै सिरिज जित्ने लक्ष्यमा छ । थाइल्याण्डले नेपाल र नेदरल्याण्ड्सविरूद्ध खेलेका दुवै खेलमा जित हासिल गरेको थियो ।

नेदरल्याण्ड्सलाई भने उपाधी सम्भावना कायमै राख्न यस खेलमा जित अत्यावश्यक रहेको छ । नेदरल्याण्ड्सले जितेको तीनै खेलमा घरेलु टोली नेपाललाई पराजित गरेको थियो ।

यस सिरिजमा भने नेदरल्याण्ड्स र थाइल्याण्ड तेस्रो पटक आमने सामने हुदै छन् । अघिल्ला दुवै भेटमा नेदरल्याण्ड्स थाइल्याण्डसँग पराजित भएको थियो ।

सिरिजमा नेदरल्याण्ड्स र थाइल्याण्डको अलावा घरेलु टोली नेपालको पनि सहभागीता रहेको छ । सहभागी टोलीले एकअर्कासँग समान ३ पटक खेल्नेछन् ।

अंक तालिकाको शीर्ष स्थानमा रहने टोली विजेता बन्नेछ । नेपालले आफ्नो तथा सिरिजको अन्तिम खेलमा शुक्रवार थाइल्याण्डसँग खेल्नेछ ।