काठमाडौं(हाम्रो खेलकुद) – शुभ कसांकारको अर्धशतकको सहयोगमा अर्जुन ट्रफी राष्ट्रिय क्रिकेट प्रतियोगितामा क्रिकेट एक्सिलेन्स क्रिकेट सेन्टर(सिइसी) काठमाडौंले पहिलो जित हासिल गरेको छ ।

बुधवार भएको दिनको पहिलो खेलमा सिइसीले न्यु होराइजन बुटवललाई ६ विकेटले पराजित गरेको हो । न्यु होराइजनले दिएको १ सय १ रनको लक्ष्य सिइसीले १७.४ ओभरमा ४ विकेट गुमाएर पूरा गर्यो ।

सिइसीका लागि तेस्रो नम्बरका ब्याटर शुभले नट आउट रहँदै सर्वाधिक ५६ रन जोडे । उनले ४७ बलमा १ चौका र ५ छक्का प्रहार गरे । शिभम तिवारी ३५ बलमा २३ रन जोडे । अन्य खेलाडीले दोहोरो अंकमा रन जोड्न सकेनन् ।

होराइजनका लागि तुल बहादुर थापाले २ तथा वीर मगर र निमर्ल गुरुङले समान १ विकेट लिए ।

त्यसअघि टस जितेर पहिले ब्याटिङ गरेको होराइजनले निर्धारित २० ओभरमा ९ विकेट गुमाएर १ सय रनको योगफल तयार गरेको थियो ।

होराइजनका लागि प्रतिक श्रेष्ठले सर्वाधिक ३७ रन जोडे । उनले ३६ बलमा १ चौका र २ छक्का प्रहार गरे । कप्तान दिलिप नाथले २१ बलमा १८ तथा आरिफ खानले १४ बलमा १४ रन जोडे ।

सिइसीका लागि राज साह र सुर्य तामाङले समान ३, कप्तान नन्दन यादवले २ तथा दीपेन्द्र रावतले १ विकेट लिए ।

२ खेलमा २ अंकका साथ सिइसी समूह बी को तेस्रो स्थानमा छ । पराजित होराइजन २ खेलमा २ अंकका साथ दोस्रो स्थानमा छ । आजै हुने दोस्रो खेलमा बोष्टन झापा र घोडाघोडी-११ बीच खेल हुनेछ ।

नेपाल क्रिकेट संघ (क्यान) को बार्षिक क्यालेण्डरमा समावेश भएको प्रतियोगिता माघ २८ गतेसम्म सञ्चालन हुनेछ । प्रतियोगिताको विजेताले १० लाख र दोस्रो टोलीले ५ लाख रुपैयाँ सहित ट्रफी पाउनेछन् ।

प्रतियोगिताको सर्वोकृष्ट खेलाडीलाई १ लाख, उत्कृष्ट ब्याटर, उत्कृष्ट बलर र उदयमान खेलाडीले समान ५० हजार रुपैयाँ पाउनेछन । प्रत्येक खेलका म्यान अफ द म्याचले १० हजार रुपैयाँ प्राप्त गर्नेछन्।

प्रतियोगितामा देशभरका ८ वटा क्लबको सहभागिता रहेको छ । सहभागी टिमलाई दुई समुहमा विभाजन गर्दै लिगकम नकाउटका आधारमा प्रतियोगिता भईरहेको छ ।

प्रतियोगिताको समुह ‘ए’ मा डिसिए धनगढी, फ्रेण्ड्स युथ क्लब डडेल्धुरा, घोडाघोडी–११ र बोष्टन क्रिकेट झापा रहेका छन् ।

यस्तै समुह ‘बी’ मा सिवाईसी अत्तरिया, क्रिकेट एक्सिलेन्स सेन्टर काठमाण्डौं, न्यु होराईजन वुटवल र दशरथ चन्द एकेडेमी बैतडी रहेका छन् ।