एजेन्सी – घरेलु भुमी तथा युएईमा आयोजना हुने च्याम्पियन्स ट्रफीका लागि डिफेन्डिङ च्याम्पियन पाकिस्तानी टोलीको घोषणा भएको छ ।

पाकिस्तान क्रिकेट बोर्ड (पीसीबी) ले शुक्रवार मोहम्मद रिजवानको कप्तानीमा १५ सदस्यीय टोलीको घोषणा गरेको हो । १९ फेब्रुअरी देखि ९ मार्च सम्म पाकिस्तानमा आयोजना हुने आईसीसी च्याम्पियन्स ट्रफी २०२५ को लागि पीसीबीले ११ फेब्रुअरी सम्म टोलीमा कुनै पनि परिवर्तन गर्न सक्नेछ ।

यसै टोलीले च्याम्पियन्स ट्रफी अघि हुने न्यूजील्याण्ड र दक्षिण अफ्रिकासँग हुने त्रिकोणात्मक ओडिआई सिरिज पनि खेल्नेछ ।

गत वर्षको अन्त्यतिर दक्षिण अफ्रिकामा भएको ओडिआई सिरिजमा रहेका १५ सदस्यीय टोलीमा चार परिवर्तनहरू गरिएको छ । टोलीमा रहेका अब्दुल्लाह शफीक, मुहम्मद इरफान खान, साईम अयुब र सुफयान मोकिमलाई विश्राम दिईएको छ ।

उनीहरुको स्थानमा फहीम अशरफ, फखर जमान, खुशदिल शाह र साउद शकीललाई टिममा राखिएको छ। पाकिस्तान च्याम्पियन्स ट्रफीको साबिक विजेता समेत हो । पाकिस्तानी टोलीमा पछिल्लो पटक २०१७ मा भएको च्याम्पियन्स ट्रफी जितेको थियो ।

पाकिस्तान च्याम्पियन्स ट्रफीको समूह ए मा रहेको छ । यस समूहमा पाकिस्तानका अलावा भारत, बंगलादेश र न्युजिल्याण्ड रहेका छन् । पाकिस्तानले १९ फेब्रुअरीमा न्युजिल्याण्डसँग खेल्दै प्रतियोगिता सुरुवात गर्नेछ ।

भारतले भने आफ्ना सबै खेल युएईमा खेल्दैछ ।