काठमाडौं(हाम्रो खेलकुद) – थाइल्याण्डले त्रिकोणात्मक टि ट्वान्टी आई सिरिजको दोस्रो खेलमा शुक्रवार नेदरल्याण्ड्सलाई ८ विकेटले हराएको छ ।

१ सय २३ रनको लक्ष्य थाइल्याण्डले १८ ओभरमा २ विकेट गुमाएर पूरा गर्यो । थाइल्याण्डको जितमा नान्नापत खोन्चरोएन्कले नट आउट रहँदै सर्वाधिक ५६ रन जोडिन् । उनले ५० बलमा ५ चौका प्रहार गरिन् । अफिसारा सुवान्चोनरथी २४ बलमा २८ रन जोड्दै आउट भइन् ।

ओपनर नाट्टाया बुचाथम रनको खाता नखोल्दै आउट हुँदा नाथाकन चान्थम २३ रनमा नट आउट रहिन् ।

त्यसअघि कीर्तिपुरमा रहेको टियु क्रिकेट मैदानमा टस जितेर ब्याटिङ गरेको नेदरल्याण्ड्सले २० ओभरमा ६ विकेट गुमाएर १ सय २२ रन बनायो ।

नेदरल्याण्ड्सका लागि कप्तान बाबित डि लिडेले सर्वाधिक ५२ रन जोडिन् । उनले ५० बलमा ८ चौका प्रहार गरिन् । आरिस विलिङले २८ रन जोडिन् ।

थाइल्याण्डका लागि थिपचा पुत्थावोंगको नाममा २ तथा ओनिचा कामचोम्फुको नाममा १ विकेट रह्यो ।

सिरिजको पहिलो खेलमा नै थाइल्याण्डले जितका साथ सुरुवात गरेको छ । नेदरल्याण्ड्सले बिहीवार भएको खेलमा आयोजक नेपाललाई पराजित गरेको थियो । नेदरल्याण्ड्सले नेपाललाई २० रनले पराजित गरेको थियो ।

महिला टि ट्वान्टी आई वरियतामा थाइल्याण्ड १३औं‌, नेदरल्याण्ड्स १६औं र नेपाल २०औं स्थानमा छ । सिरिजमा सहभागी टोलीले एकअर्कासँग समान ३ पटक खेल्नेछन् ।

अंक तालिकाको शीर्ष स्थानमा रहने टोली विजेता बन्नेछ । नेपालले दोस्रो खेलमा शनिवार थाइल्याण्डसँग खेल्नेछ ।