हिमाल खरेल, बिर्तामोड

बिर्तामोड नगरपालिका र भद्रपुर नगरपालिका
दोस्रो झापा जिल्ला अन्तरपालिका पुरुष टि ट्वान्टी क्रिकेट प्रतियोगिताको सेमिफाइनलमा पुगेका छन्।

बर्खा स्मृति प्रतिष्ठान बुद्धशान्तिको आयोजना जारी प्रतियोगितामा आजको पहिलो खेलमा बिर्तामोड नगरपालिकाले झापा गाउँपालिकालाई १ सय ९८ रनले पराजित गर्दै सेमिफाइनलमा पुगेको हो ।

टस जितेर पहिले ब्याटिङको गरेको बिर्तामोड नगरपालिकाले २ सय ५२ रन बनाएको थियो ।
बिर्तामोडका लागि कप्तान समिर कार्कीले ७६ र सुवान्स बजगाईंले ६७ रन बनाएका थिए ।

ठूलो लक्ष्य पछ्याउने क्रममा झापा १३.४ ओभरमा सबै विकेट गुमाउँदै मात्र ५४ ररमा अल आउट भएको थियो।

बिर्तामोडलाई जित दिलाउन ६ विकेट लिएका विजय कार्कीले खेलको प्लेयर अफ द म्याच हुँदै ३ हजार र ट्रफी प्राप्त गरे ।

त्यस्तै, दोस्रो क्वार्टरफाइनल खेलमा भद्रपुरले कनकाई नगरपालिकालाई ५२ रनले पराजित गर्दै सेमिफाइनल प्रवेश गरेको हो ।

पहिले ब्याटिङ गरेको १९ ओभरमा सबै विकेट गुमाएर भद्रपुरले २ सय ३३ रन बनाएको थियो । अंकित सुवेदीले ९९ रनको योगदान गरेका थिए ।

२ सय ३४ रनको लक्ष्य पछ्याएको कनकाईले २० ओभरमा ९ विकेट गुमाएर १ सय ८१ रन मात्रै बनाउन सकेको थियो ।

३ विकेट पनि लिएका भद्रपुरका अंकितले खेलको प्लेयर अफ द म्याच हुँदै ३ हजार रुपैयाँ र ट्रफी पाए ।

प्रतियोगितामा बुधवार पहिलो खेलमा अर्जुनधारा नगरपालिका र गौरादह नगरपालिका भिड्ने छन् । दोस्रो खेल कचनकवल गाउँपालिका र मेचीनगर नगरपालिकाबिच हुनेछ ।

प्रतियोगिताको विजेताले १ लाख ५० हजार र दोस्रो हुने टोलीले ७५ हजार ट्रफी प्राप्त गर्नेछ।