काठमाडौं(हाम्रो खेलकुद) – दिवान पुनको अलराउण्ड प्रदर्शनमा मध्यपश्चिम विश्वविद्यालयले जय नेपाल कप टि ट्वान्टी क्रिकेटको उपाधि‌ जितेको छ ।

कीर्तिपुरस्थित टियु क्रिकेट मैदानमा मंगलवार भएको फाइनलमा नेपालको मध्यपश्चिमले भारतको लखनउ विश्वविद्यालयलाई ५८ रन हराउँदै उपाधि जित्यो ।

म १ सय ७६ रनको लक्ष्य पछ्याएको लखनउले निर्धारित २० ओभरमा ९ विकेट गुमाएर १ सय १७ रन मात्र जोड्यो ।

लखनउका लागि ओपनर ममन कन्डपालले सर्वाधिक ५८ रन जोडे । हर्ष बर्द्धन सिंहले १५ र यश बर्द्धन सिंहले १४ रन बनाए । लखनउका अन्य ब्याटरले दोहोरो अंकमा रन जोड्न सकेनन् ।

मध्यपश्चिमका लागि दिवानले ३ राजकुमार साहले २ तथा रविन्द्र जंग शाही, सुवास भण्डारी र दीनेश अधिकारीले समान १ विकेट लिए ।

त्यसअघि टस जितेर ब्याटिङ रोजेको मध्यपश्चिमले दुई ब्याटरको अर्धशतकको सहयोगमा २० ओभरमा ६ विकेट गुमाएर १ सय ७५ रनको योगफल तयार गरेको थियो ।

मध्यपश्चिमका लागि दिवान र विपिन खत्रीले अर्धशतक बनाएका थिए । विपिनले नट आउट रहँदै ५९ रन जोडे । उनले २८ बलमा ५ चौका र ४ छक्का प्रहार गरे ।

छैठौं विकेटका लागि विपिन र दिवानले १ सय १६ रनको शतकीय साझेदारी गरेका थिए । दिवानले ३६ बलमा ६ चौका र २ छक्काको सहयोगमा ५८ रन जोडेका थिए । निश्चल रावल १९ र राजकुमार साह १५ रनमा आउट भएका थिए ।

लखनउका लागि हर्ष बर्द्धन सिंह, ममन कन्डपाल र अभिषेक सोनीले समान १ विकेट लिए ।