काठमाडौं(हाम्रो खेलकुद) – नेपाली युवा अलराउण्डर कुशल मल्ल सम्मिलित डेजर्ट भाइपर्सले अन्तर्राष्ट्रिय लिग (आईएल) मा टि ट्वान्टी हार बेहोरेको छ ।

डेजर्ट सोमवार एमआई इमिरेट्ससँग १ सय ५४ रनको फराकिलो अन्तरले पराजित भएको हो । डेजर्टले ८ खेल खेलिसक्दा कुशलले डेब्युको अवसर पाएका छैनन् ।

२ सय २९ रनको लक्ष्य पछ्याएको डेजर्ट १२.३ ओभरमा ७४ रनमा अल आउट भयो । डेजर्टका लागि अजाम खानले सर्वाधिक १२ तथा कप्तान साम करन ११ रनमा आउट भए । डेजर्टका अन्य ब्याटरले दोहोरो अंकमा रन जोड्न सकेनन् ।

इमिरेट्सका लागि मोहम्मद रोहिड र अल्जारी जोसेफले समान ३ तथा डान मुस्ले र फैजल हक फारुकीले समान २ विकेट लिए ।

त्यसअघि शेख जायद क्रिकेट स्टेडियममा टस हारेर ब्याटिङको निम्तो पाएको थियो । इमिरेट्सले निर्धारित २० ओभरमा २ विकेट गुमाएर २ सय २८ रनको विशाल योगफल तयार गरेको थियो ।

इमिरेट्सका लागि टोम बेन्टनले सर्वाधिक १ सय ५ रन जोडेका थिए । उनले ५५ बलमा ९ चौका र ७ छक्का प्रहार गरेका थिए ।

आन्द्रे फ्लेचरले ५० बलमा १० चौका र ३ छक्काको सहयोगमा नट आउट ९६ रन जोडका थिए । डेजर्टका लागि मोहम्मद आमिरले १ विकेट लिए ।

जितसँगै इमिरेट्स ८ खेलमा ४ जित र ४ हारका साथ अंक तालिकाको दोस्रो स्थानमा छ । समान खेल खेलेको डेजर्ट ६ जित र २ हारका साथ अंक तालिकाको शीर्ष स्थानमा छ ।