हिमाल खरेल, बिर्तामोड

बर्खा स्मृति प्रतिष्ठान बुद्धशान्तिले आयोजना गरेको दोस्रो संस्करणको झापा जिल्ला अन्तरपालिका पुरुष टि–२० क्रिकेट प्रतियोगिताको क्वार्टरफाइनल समीकरण पूरा भएको छ ।

आज भएका दुई खेलपछि गौरादह र कचनकवलले क्वार्टर फाइनलमा स्थान सुरक्षित गरेका छन् । पहिलो खेलमा गौरादहले बुद्धशान्ति गाउँपालिकालाई २४ रनले पराजित गर्यो ।

टस हारेर पहिले ब्याटिङ गरेको गौरादहले निर्धारित २० ओभरमा २ सय २ रन बनाएको थियो । गौरादहका लागि सुरज न्यौपानेले ५४ रन र अर्जुन यादवले ५० रनको योगदान दिए ।

जवाफमा बुद्धशान्तिले ८ विकेट गुमाउँदै १ सय ७८ रन मात्र बनाउन सक्यो । बुद्धशान्तिका लागि आदिहाङ फागोले सर्वाधिक ४० रन, कप्तान अर्पण कार्कीले ३४ रन बनाए । खेलको प्लेयर अफ द म्याच गौरादहका सुरज न्यौपाने भए र उनले ३ हजार रुपैयाँ र ट्रफी पाए ।

दोस्रो खेलमा कचनकवलले गौरीगञजलाई ९ विकेटले पराजित ग¥यो । टस जितेर पहिले ब्याटिङ गरेको गौरीगञ्जले १०.५ ओभरमा सबै विकेट गुमाउँदै ४३ रन मात्र बनाउन सक्यो ।

कचनकवलका बलरहरूसामु निरीह देखिएको गौरीगञ्जका कुनै पनि ब्याटरले दोहोरो अंकमा रन जोड्न सकेनन् ।

४४ रनको लक्ष्य कचनकवलले ४.२ ओभरमा १ विकेट गुमाउँदै सजिलै पूरा गर्यो । कचनकवलका लागि दिपेश बोगटीले २ ओभरमा ८ रन खर्चेर ४ विकेट लिएर उत्कृष्ट प्रदर्शन गरे । उनी प्लेयर अफ द म्याच हुँदै नगद ३ हजार रुपैयाँ र ट्रफी पाए ।

मंगलवार क्वार्टरफाइनलका खेलह सुरु हुने आयोजकले जनाएको छ । पहिलो क्वार्टर फाइनलमा झापा गाउँपालिका र बिर्तामोड खेल्नेछन् । दोस्रो खेल कनकाई र भद्रपुर नगरपालिकाबीच हुनेछ ।

प्रतियोगिताको विजेताले १ लाख ५० हजार र दोस्रो हुने टोलीले ७५ हजार रुपैयाँ प्राप्त गर्नेछ।