सुमन अधिकारी,बुटवल

वेष्टर्न क्रिकेट क्लबले अभिषेश गौतमको उत्कृष्ट बलिङ र देव खनालको अलराउण्ड प्रदर्शनमा भैरहवामा जारी रुपन्देही सुपरलिग ‘ए’ डिभिजन क्रिकेट प्रतियोगितामा लगातार तेस्रो खेल जितेको छ ।

वेष्टर्नले आइतवार जेआर क्रिकेट क्लबलाई ८ विकेटले पराजित गरेको छ । १ सय ४० रनको लक्ष्य वेष्टर्नले २१.४ ओभरमा २ विकेटको नोक्सानीमा १ सय ४४ रन बनाउँदै सहज जित निकाल्यो।

टोलीको जितमा देव खनालले अर्धशतक बनाए । देव ५५ रनमा नटआउट रहे। रन्जित खड्काले ३३, मिर्नाल गुरुङले नटआउट २९ र भुवन पाण्डेले १८ रन बनाए । बलिङमा जेआरका विशाल भुसाल र कुशल भूर्तेलले समान १ विकेट लिए ।

भैरहवास्थित सिद्धार्थ क्रिकेट मैदानमा टस जितेर ब्याटिङ गरेको जेआरले निर्धारित ४६ ओभरमा ३७ ओभरमा सबै विकेट गुमाएर १ सय ३९ रन बनाएको थियो ।
उसका लागि सन्दिप जोराले अर्धशतक बनाए । उनले ६६ रन जोडे । विशाल भुसालले १९, नविन भुसालले १४, दीलिप नाथले १३ र अनमोल थापाले १२ रन बनाए ।

बलिङमा वेष्टर्नका अभिषेश गौतमले १० ओभरमा १ मेर्डनसहित २८ रन खर्चेर ६ विकेट लिए । देवले २ तथा सुझाव थापा र इशान पाण्डेले समान १विकेट लिए । खेलमा अभिशेष गौतम प्लेयर अफ द म्याच घोषित भए ।

रुपन्देही क्रिकेट संघको आयोजनामा जारी प्रतियोगिताको विजेता टोली १ लाख १ रुपैयाँ र दोस्रो टोलीले ५० हजार १ रुपैयाँ प्राप्त गर्नेछ ।