काठमाडौं(हाम्रो खेलकुद) – नेपाली युवा अलराउण्डर कुशल मल्ल सम्मिलित डेजर्ट भाइपर्सले अन्तर्राष्ट्रिय लिग (आईएल) टि ट्वान्टीको प्लेअफमा पुगेको छ ।

लिगमा ३ खेल खेल्न बाँकी रहदा डेजर्टले प्लेअफमा स्थान पक्का गरेको हो । डेजर्टले शनिवार भएको खेलमा सारजहा वारियर्सलाई ८ विकेटले हराउँदै प्लेअफमा स्थान पक्का गरेको हो। डेजर्टले ७ खेल खेलिसक्दा कुशलले डेब्युको अवसर पाएका छैनन् ।

१ सय ५२ रनको लक्ष्य डेजर्टले १४.५ ओभरमा २ विकेट गमाएर पूरा गर्यो । डेजर्टको जितमा ओपनर्र एलेक्स हेल्सले नट आउट रहँदै सर्वाधिक ७७ रन जोडे । उनले ४२ बलमा ७ चौका र ५ छक्का प्रहार गरे ।

फखर जमान ७ रनमा आउट हुँदा कप्तान साम करन ५४ रनमा नट आउट रहे । सारजहाका एडम मिल्नेले २ विकेट लिए ।

त्यसअघि सारजहा क्रिकेट स्टेडियममा टस हारेर घरेलु टोलीले ब्याटिङको निम्तो पाएको थियो । सारजहाले निधर्नरित २० ओभरमा ८ विकेट गुमाएर १ सय ५१ रनको योगफल तयार गरेको थियो ।

सारजहाका लागि जेसन रोयले नट आउट रहँदै सर्वाधिक ५५, टोम कुलर क्याटमोरले ४२ तथा टिम साइफर्डले १६ रन जोडे । डेजर्टका खुजैमा तन्भिरले ४, डेविड पाइनीले २ तथा मोहम्मद आमिर र वानिन्दु हसरंगाले समान १ विकेट लिए ।

डेजर्ट ७ खेलमा ६ जित र १ हारका साथ अंक तालिकाको शीर्ष स्थानमा छ । सारजहा ६ खेलमा २ जितका साथ छैटौं स्थानमा छ ।