काठमाडौं(हाम्रो खेलकुद) – मध्यपश्चिम र लखनउ विश्वविद्यालय राजधानीमा जारी जय नेपाल कप क्रिकेट प्रतियोगिताको सेमिफाइनल पुगेको छ ।

शनिवार भएको खेलमा नेपालको मध्यपश्चिमले लखनउलाई २ विकेटले पराजित गरि समूह विजेताको रुपमा सेमिफाइनल पुगेको हो । पराजित लखनउ समूह उपविजेता रुपमा सेमिफाइनल पुगेको हो ।

लखनउले दिएको १ सय ४२ रनको लक्ष्य मध्यपश्चिमले १९.४ ओभरमा ८ विकेट गुमाएर पूरा गर्यो । मध्यपश्चिमको जितमा ओपनर निश्चल रावलले सर्वाधिक ४९ रन जोडे । उनले ४४ बलमा ६ चौका र २ छक्का प्रहार गरे ।

दीपक डुम्रेले २७ बलमा ५ चौका र १ छक्काको सहयोगमा ४३, मनिश थापाले १५ तथा विपिन खत्रीले नट आउट १४ रन जोडे ।

लखनउका लागि संञ्जय विश्वकर्माले ४, अभिषेक सोनीले २ तथा अभिषेक प्रकाश र अनन्द सागरले समान १ विकेट लिए ।

त्यसअघि कीर्तिपुरस्थित टियु मैदानमा टस जितेर ब्याटिङ रोजेको लखनउले निर्धारित २० ओभरमा ८ विकेट गुमाएर १ सय ४१ रन जोडेको थियो ।

लखनउका लागि आदित्य प्रताप सिंहले सर्वाधिक ६२ रन जोडे । ओमकार सिंहले ३२ रन जोड्नु बाहेक अन्य ब्याटरले दोहोरो अंकमा रन जोड्न सकेनन् । मध्यपश्चिमका लागि राजकुमार शाहले ३ तथा कप्तान विपिन खत्री, दीनेश अधिकारी र दीवान पुनले समान १ विकेट लिए ।

जितसँगै मध्यपश्चिम समूह चरणको ३ खेलमा अपराजित रहँदै सेमिफाइनल पुगेको छ । पराजित लखनउ २ जित र १ हारका साथ सेमिफाइनल पुगेको छ । समूह ए बाट सेमिफाइनल पुग्ने टोली तय आइतवार हुनेछ ।

आजै भएको दोस्रो खेलमा काठमाडौंले दिल्लीलाई ३९ रनले पराजित गर्यो ।