धनगढी (हाम्रो खेलकुद)- नेपाली राष्ट्रिय क्रिकेट टोलीका ओपनर कुशल भुर्तेलले डडेल्धुराको फ्रेन्ड्स क्लबबाट अर्जुन ट्रफी राष्ट्रिय क्रिकेट प्रतियोगिता खेल्ने भएका छन् ।

धनगढीको फाप्ला अन्तराष्ट्रिय क्रिकेट मैदानमा माघ १९ गते हुने उद्घाटन खेलमा फेन्ड्सले डिसिए धनगढी विरुद्ध खेल्दै प्रतियोगिताको सुरुवात गर्नेछ ।

फेन्ड्सले माघ २१ गते वोष्टन क्रिकेट झापासँग र माघ २४ गते घोडाघोडी–११ सुख्खडसँग खेल्नेछ । हालै सम्पन्न जय ट्रफीमा नेपाल पुलिस क्लबलाई च्याम्पियन बनाउन कुशलले उत्कृष्ट प्रदर्शन गरेका थिए ।

नेपाल प्रिमियर लिग (एनपिएलमा) कुशलले पोखरा एभेञ्जरका मार्की खेलाडीका‌ साथै कप्तान थिए ।
गो ड्रिमर्सको आयोजनामा यस बर्षदेखि नेपाल क्रिकेट संघको बार्षिक क्यालेण्डरमा समावेश भएको प्रतियोगिताका सबै खेलका टिकटहरु खल्ती एपबाट काट्न सकिने आयोजकले जनाएको छ ।

अर्जुन खड्काको स्मृतिमा आयोजना गर्न लागेको प्रतियोगितामा झण्डै २० लाख रुपैयाँ पुरस्कार रहेको छ।
रनिङ ट्रफीको रुपमा टि ट्वान्टी २० फर्म्याट प्रतियोगिताको विजेताले १० लाख र दोस्रो टोलीले ले ५ लाख सहित ट्रफी पाउनेछन् ।

प्रतियोगिताको सर्वोकृष्ट खेलाडीलाई १ लाख, उत्कृष्ट ब्याटर, उत्कृष्ट बलर र उदयमान खेलाडीले जनही ५० हजार रुपैयाँ पाउनेछन् । प्रत्येक खेलको प्लेयर अफ द म्याचले १० हजार रुपैयाँ प्राप्त गर्नेछन् ।

प्रतियोगितामा ८ वटा टोलीको सहभागिता रहने छ । सबै टोलीहरुले ए क्याटोगोरीका ४ जना, बी क्याटोगोरीका ५ जना र बाँकी सी क्याटोगोरीका गरी १४ खेलाडी समावेश गर्न पाउनेछन् ।

ए क्याटोगोरीमा नेपाली राष्ट्रिय टोली खेलाडी छन्।‌ बी क्याटोगोरीमा नेपाल ए, नेपाली यु १९ टोली र प्रदेश स्तरिय सिनियर खेलाडी छन् । सी क्याटोगोरीमा नेपाल यु १६ टोली, प्रदेशका यु १९ र यु १६ टोलीका खेलाडी र अन्य खेलाडी छन् ।