काठमाडौं(हाम्रो खेलकुद) – विभागीय टोली एपिएफ क्लबकी कप्तान इन्दु बर्मा प्रधानमन्त्री कप महिला राष्ट्रिय प्रतियोगिताको सर्वोत्कृष्ट खेलाडी घोषित भएकी छिन् ।

कैलालीको‌ धनगढीमा शनिवार सम्पन्न फाइनल खेलमा एपिएफ सुदूरपश्चिम प्रदेशलाई पराजित गर्दै च्याम्पियन बनेको थियो ।

टोलीलाई च्याम्पियन बनाउँन बल र ब्याटबाट महत्वपूर्ण योगदान गरेकी इन्दु प्रतियोगिताको सर्वोत्कृष्ट खेलाडी भएकी हुन् ।

इन्दुले प्रतियोगितामा ब्याटिङतर्फ ५ इनिङमा १ सय ७२ रन जोडेकी थिइन् । उनी २ अर्धशतक सहित प्रतियोगिताको शीर्ष रन कर्ताको सुचीमा दोस्रो स्थानमा रहेकी थिइन् । बलिङतर्फ उनले ६ खेलमा ५ विकेट लिएकी थिइन् । इन्दुले ४ को इकोनोमीमा रन खर्चिएकी थिइन् ।

त्यस्तै, प्रतियोगिताको उत्कृष्ट ब्याटर एपिएफकी ममता चौधरी भइन् । उनले प्रतियोगिताको ६ खेलमा १ अर्धशतक सहित २ सय ९ रन जोडेकी थिइन् ।

प्रतियोगिताको उत्कृष्ट बलर भने बागमती प्रदेशकी मनिषा उपाध्याय भइन् । उनले प्रतियोगिताको ५ खेलमा १ ह्याट्रिक सहित १० विकेट लिएकी थिइन् । कविता जोशी फाइनल खेलको प्लेयर अफ द म्याच भइन् ।

कविताले फाइनल खेलमा ३ विकेट लिएकी थिइन् । फाइनलमा सुदूरपश्चिम प्रदेशलाई ९ विकेटले पराजित गर्दै एपिएफ च्याम्पियन भएको थियो ।