महिला पिएम कप – अपराजित रहँदै एपिएफ च्याम्पियन

काठमाडौं(हाम्रो खेलकुद) – विभागीय टोली एपिएफ क्लब प्रधानमन्त्री कप महिला राष्ट्रिय क्रिकेट प्रतियोगिताको च्याम्पियन भएको छ ।

कैलाली धनगढीस्थित फाप्ला क्रिकेट मैदानमा शनिवार भएको फाइनलमा सुदूरपश्चिम प्रदेशलाई ९ विकेटले पराजित गरेको एपिएफले अपराजित रहँदै उपाधि जितेको हो ।

६८ रनको लक्ष्य एपिएफले १२.५ ओभरमा १ विकेट गुमाएर पूरा गर्यो । टोली ओपनर ममता चौधरीले नट आउट रहँदै सर्वाधिक ४४ रन जोडिन् ।

दोस्रो विकेटका लागि ममता र कप्तान इन्दु बर्माले ४४ रनको विजयी साझेदारी गरिन् । इन्दु १८ रनमा नट आउट रहँदा राजमती ऐरीले ४ रन बनाइन् ।

त्यसअघि टस जितेर ब्याटिङ रोजेको सुदूरपश्चिम प्रदेशले १८.१ ओभरमा अल आउट हुँदै ६७ रन जोड्यो ।

सुदूरपश्चिम प्रदेशका लागि मनिषा बोहाराले सर्वाधिक १८ तथा बिन्दु रावलले १७ रन जोडिन् । अन्य ब्याटरले दोहोरो अंकमा रन बनाउन सकेनन् ।

एपिएफका लागि कविता जोशीले ३, सबनम राई र कप्तान इन्दुले समान २ विकेट लिए । एपिएफ लगातार दुई संस्करणको विजेता भएको हो ।

गत संस्करणमा कोशी प्रदेशलाई हराउँदै एपिएफ च्याम्पियन भएको थियो । एपिएफ प्रतियाेगिताकाे इतिहासमा भने साताैं पटक च्याम्पियन भएकाे हाे ।

Latest News