काठमाडौं(हाम्रो खेलकुद) – ओपनर सम्झना खड्काको अर्धशतकको सहयोगमा कैलालीमा जारी प्रधानमन्त्री कप महिला राष्ट्रिय क्रिकेट प्रतियोगितामा त्रिभुवन आर्मी क्लबले सुदूरपश्चिम प्रदेशलाई हराएको छ ।

बिहीवार भएको सुपर फोरको खेलमा विभागीय टोली आर्मीले सुदूरपश्चिम प्रदेशलाई १४ रनले हराएको हो । आर्मी समूह बी को विजेता तथा सुदूरपश्चिम समूह ए को उपविजेता बन्दै सुपर फोरमा पुगेका थिए ।

१ सय ११ रनको लक्ष्य पछ्याएको सुदूरपश्चिमले निर्धारित २० ओभरमा ६ विकेट गुमाएर ९६ रन मात्र बनाउन सक्यो ।

सुदूरपश्चिमका लागि ओपनर मनिषा बोहोराले सर्वाधिक १८ रनजोडिन् । अर्की ओपनर कविता कुँवरले १६ तथा कप्तान बिन्दु रावलले ११ रन जोडिन् ।

सुदूरपश्चिमका अन्य ब्याटरले दोहोरो अंकमा रन जोड्न सकेनन् । आर्मीका लागि सुस्मिता भुषालले ३, सिता शाही र कप्तान लक्ष्मी साउदले समान १ विकेट लिइन् ।

त्यसअघि धनगढीस्थित फाप्ला क्रिकेट मैदानमा टस हारेर पहिले ब्याटिङको निम्तो पाएको आर्मीले निर्धारित २० ओभरमा ६ विकेट गुमाएर १ सय १० रन जोडेको थियो ।

आर्मीका लागि ओपनर सम्झनाले नट आउट रहँदै सर्वाधिक ७४ रन जोडिन् । उनले ५७ बलमा ८ चौका प्रहार गरिन् । आर्मीका अन्य ब्याटरले दोहोरो अंकमा रन जोड्न सकेनन् ।

सुदूरपश्चिमका लागि जानकी थापाले २, रेवती धामी र आशिका महराले समान १ विकेट लिए । आजै भएको सुपर फोरको पहिलो खेलमा एपिएफले बागमती प्रदेशलाई पराजित गरेको थियो ।

प्रतियोगितामा २ विभागीय र ७ प्रदेशको टोलीले प्रतिस्पर्धा गरिरहेका छन् । सहभागी टोलीलाई दुई समूहमा विभाजन गरिएको थियो ।

समूह ए मा लुम्बिनी , गण्डकी , कर्णाली , एपिएफ क्लब र सुदूरपश्चिम थिए । समूह बी मा कोशी , मधेश , बागमती, त्रिभुवन आर्मी क्लब थिए ।

दुई समूहबाट शीर्ष दुई टोली सुपर फोरमा प्रवेश गरेका छन् । समूह ‘ए’ बाट एपिएफ र सुदूरपश्चिम प्रदेश तथा समूह ‘बी’ बाट त्रिभुवन आर्मी क्लब र बागमती प्रदेश सुपर फोरमा पुगिसकेका छन् ।

सुपर फोरमा एक समूहको टोलीले अर्को समूहको टोलीसँग खेल्नेछन् । सुपर फोरको शीर्ष २ मा रहने टोलीको बीचमा फाइनल खेल हुनेछ ।