काठमाडौं(हाम्रो खेलकुद) – नेपाली युवा अलराउण्डर कुशल मल्ल सम्मिलित डेजर्ट भाइपर्सले अन्तर्राष्ट्रिय लिग (आईएल) टि ट्वान्टीमा अर्को जित हासिल गरेको छ ।

सुरुवाती ४ खेलमा लगातार जित हात पारेको डेजर्ट पाँचौ खेलमा भने पराजित भएको थियो । लिगको आफ्नो छैठौं खेलमा भने डेजर्टले फेरि जित हात पारेको हो ।

डेजर्टले बुधवार भएको खेलमा सारजहा वारियर्सलाई १० विकेटले पराजित गरेको हो । डेजर्टले ६ खेल खेलिसक्दा कुशलले डेब्युको अवसर पाएका छैनन् ।

९२ रनको सामान्य लक्ष्य डेजर्टले १० ओभरमा कुनै विकेट नगुमाइ पूरा गर्यो । डेजर्टको जितमा ओपनरद्वय नट आउट रहे । फखर जमानले सर्वाधिक ७१ रन जोडे । उनले ३९ बलमा ७ चौका र ४ छक्का प्रहार गरे । एलेक्स हेल्सले २१ बलमा २३ रन बनाए ।

त्यसअघि दुबई क्रिकेट स्टेडियममा टस हारेर सारजहाले ब्याटिङको निम्तो पाएको थियो । सारजहा १९.१ ओभरमा ९१ रनमा अल आउट भएको थियो ।

सारजहाका लागि जेसन रोयले नट आउट रहँदै सर्वाधिक ३० र लुक वल्सले ११ रन जोड्नु बाहेक अन्य ब्याटरले दोहोरो अंकमा रन बनाउँन सकेनन् ।

कप्तान सिकन्दर राजाले २४, ओपनर बेन डुकले १३ तथा नजिबुल्लाह जाद्रानले १० रन बनाए । डेजर्टका मोहम्मद आमिरले ४, वानिन्दु हसरंगाले ३ तथा साम करनले २ विकेट लिए ।

डेजर्ट ६ खेलमा ५ जित र १ हारका साथ अंक तालिकाको शीर्ष स्थानमा छ । सारजहा ५ खेलमा २ जितका साथ पाँचौ स्थानमा छ ।