सुमन अधिकारी, बुटवल

जे आर क्रिकेट क्लब बुटवल भैरहवामा जारी रुपन्देही ‘ए’ डिभिजन सुपरलिग क्रिकेट प्रतियोगितामा  बुधवार विजयी भएको छ ।

सन्दीप जोराको अर्धशतकमा जेआरले प्रोफेसनल माष्टर्स-११ लाई ५ विकेटले हरायो । भैरहवास्थित सिद्धार्थ क्रिकेट मैदानमा टस जितेर ब्याटिङ गरेको प्रोफेसनलले निर्धारित ३७ ओभरको खेलमा ३० ओभरमा सबै विकेट गुमाएर १ सय १८ रन बनाएको थियो ।

टोलीका  ड्रस सुनार र मोहम्मद हुसेनले समान २१, इमरान खानले १७, करण साहनीले १५ र अख्तर हुसेनले १४ रन बनाए ।

जे आरका आषिश भट्टराई र विनय जिसीले समान ३  कुशल भुर्तेल, सागर गिरी, सन्दीप जोरा र विमल भुसालले समान १  विकेट लिए ।

१ सय १९ रनको लक्ष्य पछ्याएको जेआरले २३. ४ ओभरमा सन्दीप जोराको नटआउट ६२ रनसँगै  ५ विकेट गुमाएर १ सय २२ रन बनायो।

टोलीका अनमोल थापाले २०, सुलभ चौधरीले नटआउट १४ र कुशलले ११ रन जोडे। प्रोफेसनलका कृष्ण पराजुली र अख्तर हुसेनले समान २‌ र करण साहनीले १ विकेट लिए। जेआरका खेलमा सन्दीप जोरा प्लेयर अफ द म्याच भए ।

रुपन्देही क्रिकेट संघको आयोजनामा जारी प्रतियोगिताको विजेता १ लाख १ रुपैयाँ प्राप्त गर्ने छ ।  बिहीवार वेष्टन क्रिकेट क्लब र एमसिसिबिच खेल हुने  प्रतियोगिता संयोजक निरजप्रताप खाँणले जनाएका छन् ।