धनगढी (हाम्रो खेलकुद)-  धनगढीमा  अर्को साता सुरु हुने अर्जुन ट्रफी राष्ट्रिय क्रिकेट प्रतियोगिताका लागि कैलालीको सिवाइसी अत्तरियाले ४ जना राष्ट्रिय खेलाडी अनुबन्ध गरेको छ ।

गो ड्रिमर्सको आयोजनामा यस बर्षदेखि नेपाल क्रिकेट संघको बार्षिक क्यालेण्डरमा समावेश भएको प्रतियोगिताका लागि भीम सार्की, विवेक यादव, साहब आलम र रसिद खानले सिवाइसी अत्तरियाबाट खेल्ने भएका हुन् ।

हालै सम्पन्न नेपाल प्रिमियर लिगमा भीम, साहव र रसिदले काठमाण्डौं गोर्खाजबाट खेलेका थिए । विवेकले लुम्बीनी लायन्सबाट खेलेका थिए ।

सिवाइसीले ए क्याटोगोरीका ४ जना, बी क्याटोगोरीका ५ गरि ९ जना खेलाडी लाई राखेर टोली निर्माण गरिरहेको छ । बी क्याटोगोरीबाट सिवाईसीले सन्तोष कार्की, तृप्त दास, दिपेश कँडेल, शंकर राना र सन्दीप क्षेत्रीलाई टीमा समावेश गरेको छ ।

सी क्याटोगोरीका खेलाडीहरुको छनोट कार्य भईरहेको र केही दिनमा १४ सदस्यीय टोलीको घोषणा गरिने प्रशिक्षक रजत शाहीले जानकारी दिए ।

स्वर्गीय अर्जुन खड्काको स्मृतिमा माघ १९ गतेदेखि २८ गते (फेब्रअरी१ देखि १०) सम्म आयोजना गर्न लागेको अर्जुन ट्रफीमा झण्डै २० लाख नगद पुरस्कार प्रदान गरिनेछ ।

रनिङ ट्रफीको रुपमा टि ट्वान्टी फर्म्याटमा हुने प्रतियोगिताको विजेताले १० लाख र उपविजेताले ५ लाख रुपैयाँ सहित ट्रफी पाउनेछन् ।

प्रतियोगिताको सर्वोकृष्ट खेलाडीलाई १ लाख, उत्कृष्ट ब्याटर, उत्कृष्ट बलर र उदयमान खेलाडीले जनही ५० हजार रुपैयाँ पाउनेछन् । प्रत्येक खेलका प्लेयर अफ द म्याचलाई १० हजार रुपैयाँ प्रदान गरिनेछ ।

लिगकम नकआउटका आधारमा आयोजना हुने प्रतियोगिताका सबै खेल धनगढी स्थित फाप्ला अन्तराष्ट्रिय क्रिकेट मैदानमा हुनेछन् ।

प्रतियोगितामा ८ टोलीको सहभागिता रहनेछ । प्रतियोगितामा डिसिए धनगढी, सिवाइसी अत्तरिया, क्रिकेट एक्सिलेन्स सेन्टर (सिइसी) काठमाण्डौं, फेण्ड्स युथ क्लब डडेल्धुरा, घोडाघोडी–११ सुख्खड, न्यु होराईजन बुटवल, दशरथ चन्द एकेडेमी बैतडी र वोष्टन क्रिकेट झापाले प्रतिस्पर्धा गर्नेछन्।