काठमाडौं (हाम्रो खेलकुद) – कप्तान रुबिना क्षेत्रीको अर्धशतक सहयोगमा कोशी प्रदेशले कैलालीमा जारी प्रधानमन्त्री कप महिला राष्ट्रिय क्रिकेट प्रतियोगितामा मधेश प्रदेशमाथि सहज जित हात पारेको छ ।

सोमवार दिनको दोस्रो खेलमा कोशीले लगातार दोस्रो जित हासिल गर्ने क्रममा मधेशलाई ४७ रनले पराजित गरेको हो ।

कोशीले दिएको १ सय ७ रनको लक्ष्य पछ्याएको मधेश निर्धारित २० ओभरमा ९ विकेट गुमाएर ५९ रन बनायो । मधेशका लागि प्रतिमा शाहले सर्वाधिक १७ रन जोड्नु बाहेक अन्य ब्याटरले दोहोरो अंकमा रन जोड्न सकेनन् ।

कोशीका लागि कप्तान रुबिना क्षेत्रीले ३, अलिसा खडिया र ज्योती दनुवारले समान २ तथा संगिता राईले १ विकेट लिइन् । त्यसअघि धनगढीस्थित फाप्ला क्रिकेट मैदानमा टस जितेर ब्याटिङ रोजेको कोशीले निर्धारित २० ओभरमा ५ विकेट गुमाएर १ सय ६ रन जोड्यो ।

कोशीका लागि कप्तान रुबिना क्षेत्रीले सर्वाधिक ५७ रन जोडिन् । उनले ५३ बलमा ७ चौका प्रहार गरिन् । टिका शाहले २१ तथा विमला मलाहले ५ रन जोडिन् । मधेशका लागि प्रतिमा शाहले २ तथा दिप राम, भुमी सिंह र सरस्वती कुमारीले समान १ विकेट लिए ।

अपराजित कोशी ४ अंकका साथ समूह बी को शीर्ष स्थानमा छ । खेलेको २ खेलमा अंक बिहिन मधेश तालिकाको चौथो स्थानमा छ । आजै भएको पहिलो खेलमा बागमती प्रदेशले विभाथीय टोली त्रिभुवन आर्मी क्लबलाई १४ रनले पराजित गरेको थियो ।

प्रतियोगितामा २ विभागीय र ७ प्रदेशको टोलीले प्रतिस्पर्धा गरिरहेका छन् । सहभागी टोलीलाई दुई समूहमा विभाजन गरिएको छ ।

समूह ए मा लुम्बिनी , गण्डकी , कर्णाली , एपिएफ क्लब र सुदूरपश्चिम छन् । समूह बी मा कोशी , मधेश , बागमती त्रिभुवन आर्मी क्लब छन् । दुई समूहबाट शीर्ष दुई टोली सुपर फोरमा प्रवेश गर्ने छन् । समूह ‘ए’ बाट एपिएफ र सुदूरपश्चिम प्रदेश सुपर फोरमा पुगिसकेका छन् ।

सुपर फोरमा एक समूहको टोलीले अर्को समूहको टोलीसँग खेल्नेछन् । सुपर फोरमा शीर्ष दुईमा रहने टोलीबिच फाइनल हुनेछ । दुवै समूहका तेस्रो स्थानमा रहने टोलीहरुले पाँचौ र छैटौं स्थानका लागि खेल्नेछन् ।