काठमाडौं(हाम्रो खेलकुद) – नेपाली युवा अलराउण्डर कुशल मल्ल सम्मिलित डेजर्ट भाइपर्सले अन्तर्राष्ट्रिय लिग (आईएल) टि ट्वान्टीमा लगातार तेस्रो जित हासिल गरेको छ ।

लगातार तेस्रो जित हात पार्ने क्रममा डेजर्टले बिहीवार भएको खेलमा एमआई इमिरेट्सलाई ५ विकेटले पराजित गरेको छ । डेजर्टले लगातार ३ खेल जित्दा कुशलले भने लिगमा डेब्युको अवसर पाएका छैनन् ।

एमआईले दिएको १ सय ६० रनको लक्ष्य डेजर्टले १९.१ ओभरमा ५ विकेट गुमाएर पूरा गर्यो । डेजर्टका लागि प्लेयर अफ द म्याच भएका फखर जमानले सर्वाधिक ६७ रन जोडे । एलेक्स हेल्स ३४ तथा साम करण २८ रनमा आउट हुँदा शरफन रादरफोर्ड २१ रनमा नट आउट रहे ।

एमआईका लागि डान मुस्ले र जाहोर खानले समान २ तथा वाकार सलामखेलले १ विकेट लिए । त्यसअघि दुबईमा टस जितेर पहिले ब्याटिङ गरेको एमआईले २० ओभरमा ६ विकेट गुमाएर १ सय ५९ रन जोडेको थियो ।

एमआईका लागि किरन पोलार्डले सर्वाधिक ३६ रन जोडे । कुशल परेरा ३३, मोहम्मद वासिम १८ रनमा आउट हुँदा रोमारियो शेफर्ड १६ रनमा नट आउट रहे । डेजर्टका लागि कप्तान लकि फर्गुसनले २ तथा डान लरेन्स, वानिन्दु हसरंगा र डेविड पाइनीले समान १ विकेट लिए ।

जित पछि डेजर्ट ३ खेलमा अपराजित रहदै अंक तालिकाको शीर्ष स्थानमा छ । पराजित एमआई ३ खेलमा १ जितका साथ तेस्रो स्थानमा छ ।