काठमाडौं(हाम्रो खेलकुद) – त्रिभुवन आर्मी क्लबका साहब आलम जय ट्रफी मेन्स एलिट कप प्रतियोगिताको सर्वोत्कृष्ट खेलाडी घोषित भएका छन् ।

साहबले प्रतियोगितामा खेलेको ४ खेलको ८ इनिङमा ३३ विकेट लिएका थिए । साहबले १ सय २७.५ ओभरमा ३३ मेडन राख्दै २.८८ को इकोनोमिमा रन खर्चिएका थिए । उनले ४ इनिङमा ५ विकेट लिएका थिए ।

साहबले एलिट कपको उत्कृष्ट ब्याटर समेत बनेका छन् । यो अवार्ड लिग चरणको प्रदर्शनको आधारमा दिइएको थियो । लिग चरणको खेलमा साहबले २१ विकेट लिएका थिए ।

मधेश प्रदेशका ओपनर मयन यादव प्रतियोगिताको उत्कृष्ट ब्याटर चुनिए । उनले ३ खेलमा १ शतक तथा १ अर्धशतकको सहयोगमा २ सय ६८ रन जोडेका थिए । प्रतियोगितामा शतक प्रहार गर्ने मयन एक मात्र खेलाडी रहेका थिए ।

फाइनलको दुवै इनिङमा गरेर ११ विकेट लिने नेपाल पुलिस क्लबका सागर ढकाल प्लेयर अफ द फाइनल भए । बिहीवार विभागीय ड्रर्बी फाइनलमा आर्मीलाई २८ रनले पराजित गर्दै पुलिस च्याम्पियन भएको थियो ।

पहिलो संस्करणको जय ट्रफी मेन्स एलिट कपमा पछिल्लो पिएम कपका शीर्ष ४ (नेपाल पुलिस, त्रिभुवन आर्मी, मधेश प्रदेश र बागमती प्रदेश) टोलीको सहभागिता थियो ।

लिग चरणका खेल दुई दिवसीय र फाइनल तीन दिवसीय फर्म्याटमा भएको थियो।