काठमाडौं(हाम्रो खेलकुद) – धनगढीमा जारी महिला प्रधानमन्त्री कप राष्ट्रिय टि ट्वान्टी क्रिकेट प्रतियोगिताको तेस्रो दिन आजका दुवै खेल रद्द भएका छन् ।

धनगढी क्रिकेट मैदानमा हुनु पर्ने समूह ‘ए’ मा कर्णाली प्रदेश र गण्डकी प्रदेशबीचको पहिलो तथा नेपाल एपिएफ क्लब र लुम्बिनी प्रदेशबीचको खेलमा टस नभई रद्द भएको छ । खेल रद्द भएसँगै सबै टिमले समान १ अंक बाडेका छन् ।

समूह ए मा एपिएफ ३ खेलमा ५ अंकका साथ शीर्ष स्थानमा छ । सुदूरपश्चिम प्रदेश २ खेलमा ४ अंकका साथ दोस्रो स्थानमा छ ।

गण्डकी, लुम्बिनी र कर्णाली प्रदेशको समान १ अंक छ । प्रतियोगितामा २ विभागीय र ७ प्रदेशको टोलीले प्रतिस्पर्धा गरिरहेका छन् । सहभागी टोलीलाई दुई समूहमा विभाजन गरिएको छ ।

समूह १ मा लुम्बिनी , गण्डकी , कर्णाली , एपिएफ क्लब र सुदूरपश्चिम छन् । समूह २ मा कोशी , मधेश , बागमती त्रिभुवन आर्मी क्लब छन् ।

दुई समूहबाट शीर्ष दुई टोली सुपर फोरमा प्रवेश गर्ने छन् । सुपर फोरमा एक समूहको टोलीले अर्को समूहको टोलीसँग खेल्नेछन् । सुपर फोरमा शीर्ष दुईमा रहने टोलीबिच फाइनल हुनेछ ।

समूहका तेस्रो स्थानमा रहने टोलीहरुले पाँचौ र छैटौं स्थानका लागि खेल्नेछन् । प्रतियोगितामा हरेक दिन दुई खेल हुनेछ । पहिलो खेल बिहान ९ तथा दोस्रो खेल दिउँसो १ बजे सुरु हुनेछ ।