काठमाडौं(हाम्रो खेलकुद) – जय ट्रफी मेन्स एलिट कप क्रिकेटको फाइनलमा त्रिभुवन आर्मी क्लबविरुद्ध नेपाल पुलिस क्लबले सामान्य अग्रता लिएको छ।

वीरगंजमा जारी फाइनलमा पुलिसले दोस्रो दिन बुधवारको खेल सकिँदा दोस्रो इनिङमा ९५ रनको अग्रता लिएको छ । दोस्रो दिनको समाप्तिमा पुलिसले १ सय ३२ रन जोड्दा ९ विकेट गुमाएको छ ।

पुलिसका लागि कुशल भुर्तेलले ४५ रन जोडे । पहिलो विकेटका लागि ओपनर कुशल र अमित श्रेष्ठले ५१ रनको साझेदारी गर्दै फराकिलो अग्रताको संकेत गरेका थिए । अमित १३ रन जोडे । दीलिप नाथ ३४ तथा राशिद खान १८ रन बनाए ।

पुलिसका अन्य ब्याटरले दोहोरो अंकमा रन जोड्न सकेनन् । पुलिसका लागि सागर ढकाल र ललितनारायण राजवंशी क्रिजमा छन् ।

दोस्रो दिन ब्याटिङ गरेको आर्मीले पहिलो इनिङमा १ सय ७० रन बनाउँद ३७ रनको सामान्य अग्रता लिएको थियो ।

आर्मीका लागि भीम सार्कीले सर्वाधिक ५८ रन जोडे । उनले ५५ बलमा ६ चौका र ३ छक्का प्रहार गरे । बसिर अहमद ४०, सोमपाल कामी ३२ तथा कप्तान विनोद भण्डारी १४ रन बनाए।

पुलिसका लागि सागर ढकालले १५.५ ओभरमा ७८ रन खर्चिएर ५ विकेट लिए । कुशल भुर्तेलले ३ तथा ललित र गुलशन झाले समान १ विकेट लिए ।

त्यसअघि टस हारेर ब्याटिङको निम्तो पाएको पुलिसले ९ विकेट गुमाएर १ सय ३३ रन जोडेको अवस्थामा इनिङ समाप्तिको घोषणा गर्यो । २ विकेटको क्षतिमा ८५ रनबाट पुलिसले दोस्रो दिनको खेल सुरु गरेको हो।

पुलिसका लागि ओपनर कुशलले सर्वाधिक ५१ रन जोडे । उनले ५६ बलमा ६ चौका प्रहार गरे । अर्जुन साउद २८, अमित २० र राशिद १० रन बनाए ।

आर्मीका साहब आलमले १२.४ ओभरमा ३७ रन खर्चिएर ७ विकेट लिए । सोमपाल र बसिर अहमदले समान १ विकेट लिए ।