काठमाडौं(हाम्रो खेलकुद) – स्पिनर साहब आलमले कीर्तिमानी बलिङ गरे पनि त्रिभुवन आर्मी क्लब अर्को विभागीय टोली नेपाल पुलिस क्लबसँग बराबरीमा रोकिएको छ ।

जय ट्रफी मेन्स एलिट कपको सोमवार सकिएको विभागीय डर्बी बराबरीमा सकिएको हो । १ सय ७२ रनको लक्ष्य पछ्याएको पुलिसले ५ विकेट गुमाएर ८८ रन जोडेको थियो ।

पुलिसका लागि अमित श्रेष्ठले सर्वाधिक ३६ रन जोडे । राशिद खान १० रनमा आउट हुँदा अर्जुन साउदले खेल बराबरी गर्न ९४ बलको सामना गर्दै १९ रन बनाए ।

पहिलो इनिङ्समा ४ रनले पछि परेको आर्मीले दोस्रो इनिङ्समा १ सय ७५ रन जोडेको थियो । आर्मीले दोस्रो इनिङ्समा १ सय ७१ को अग्रता लिदै पुलिसलाई १ सय ७२ रनको लक्ष्य दिएको थियो ।

आर्मीका लागि सोमपाल कामीले सर्वाधिक ८२ रन जोडे । सोमपालले १ सय ३८ बलमा १० चौका र एक छक्का प्रहार गरे ।

तृत राज दास ३४, भीम सार्की १५ तथा विवेक यादव ११ रनमा आउट हुनु बाहेक अन्य ब्याटरले दोहोरो अंकमा रन बनाउन सकेनन् । पुलिसका लागि कुशल भुर्तेलले ४, गुलशन झाले ३ तथा ललितनारायण राजवंशीले २ विकेट लिए ।

त्यसअघि विरगंजमा आइतवार टस हारेर आर्मीले पहिले ब्याटिङ गरेको थियो । आर्मीका लागि कुशल मल्लले सर्वाधिक २५ रन जोडे । उनले ३८ बलमा २ चौका र १ छक्का प्रहार गरे ।

भीम सार्की २२, कप्तान विनोद भण्डारी २१, बसिर अहमद १२ रनमा आउट हुँदा पवन कार्कीले नट आउट १५ रन जोडे ।

पुलिसका लागि ललितले १४.४ ओभरमा ४७ रन खर्चिएर ७ विकेट हात पारे । राशिद खान, कुशल भुर्तेल र श्रवण यादवले समान १ विकेट लिए ।

पहिलो इनिङ्समा पुलिसले पनि खास प्रदर्शन गर्न सकेन । पुलिस पनि १ सय २५ रन जोड्दै अल आउट भएको थियो । पुलिसका लागि गुलशनले सर्वाधिक ४७ रन जोडे । अमित श्रेष्ठ १८, राशिद खान १६, शंकर राना १३ तथा दिलिप नाथ १० रनमा आउट भए ।

आर्मीका लागि साहब आलमले १५.१ ओभरमा ५९ रन खर्चिएर ८ विकेट लिए । जय ट्रफीको एकै इनिङ्समा ८ विकेट लिने साहब पहिलो खेलाडी हुन् । सोमपाल कामी र पवन कार्कीले समान १ विकेट लिए ।

बराबरीका बाबजुद पहिलो इनिङ्समा अग्रता लिएका कारण पुलिसले नियमित ७ तथा बोनसको १४ अंक पाएको छ । पुलिसको जम्मा २१ अंक भएको छ ।

पहिलो इनिङ्समा पछि परेको कारण आर्मीले नियमित ३ तथा बोनसको १३ गरि १६ अंक पाएको छ ।