काठमाडौं(हाम्रो खेलकुद) – बायाँ हाते स्पिनर ललितनारायण राजवंशी एक्लैले ७ विकेट लिएपछि नेपाल‌ पुलिस क्लबले त्रिभुवन आर्मी क्लबलाई कम रनमा अल आउट गरेको छ ।

जय ट्रफी मेन्स एलिट कपको आफ्नो पहिलो खेलमा विभागीय डर्बीमा पुलिसले आर्मीलाई पहिलो इनिङ्समा १ सय २१ रनमा अल आउट गरेको हो ।

एउटा टोलीले पहिलो इनिङ्समा ६० ओभर खेल्न पाउँने नियम छ। आर्मी ३४.४ ओभरमा अल आउट भएको थियो । आर्मीले टस हारेर पहिले ब्याटिङ गरेको थियो । आर्मीका लागि कुशल मल्लले सर्वाधिक २५ रन जोडे । उनले ३८ बलमा २ चौका र १ छक्का प्रहार गरे ।

भीम सार्की २२, कप्तान विनोद भण्डारी २१, बसिर अहमद १२ रनमा आउट हुँदा पवन कार्कीले नट आउट १५ रन जोडे ।

पुलिसका लागि ललितले १४.४ ओभरमा ४७ रन खर्चिएर ७ विकेट हात पारे । राशिद खान, कुशल भुर्तेल र श्रवण यादवले समान १ विकेट लिए ।

आजै आफ्नो पहिलो इनिङ्सको सुरुवात गरेको पुलिस पनि खराब स्थितिमा छ । पहिलो दिनको खेल सकिदा पुलिसले ७ विकेट गुमाएर १ सय ३ रन जोडेको छ । गुलशन झा ३४ रनमा नट आउट रहँदा प्रेम तामाङले उनलाई साथ लिइरहेका छन् ।

त्यसअघि अमित श्रेष्ठ १८, राशिद खान १६, शंकर राना १३ तथा दिलिप नाथ १० रनमा आउट भए।

आर्मीका लागि साहब आलमले ११ ओभरमा ५५ रन खर्चिएर ५ विकेट लिए । सोमपाल कामी र पवन कार्कीले समान १ विकेट लिए ।