एजेन्सी – भारतले सन् २०२५ मा हुने च्याम्पियन्स ट्रफीका आफ्ना खेलहरु युएईमा खेल्ने भएको छ ।

पाकिस्तान क्रिकेट बोर्ड (पिसिबी) का अध्यक्ष मोहसिन नक्वीले शेख नाह्यान अल मुबारकसँग भेट गरेपछि यो निर्णय लाई अन्तिम रुप दिइएको बताइएको छ। शेख नाह्यान युएईका वरिष्ठ मन्त्री र इमिरेट्स क्रिकेट बोर्डका प्रमुख पनि हुन् ।

पिसीबीका प्रवक्ता आमिर मीरका अनुसार पाकिस्तानले च्याम्पियन्स ट्रफीका लागि युएईलाई तटस्थ आयोजना स्थलको रुपमा छबोट गरेको छ । पाकिस्तान र भारतबीचको खेल फेब्रुअरी २३ मा हुनेछ ।

पाकिस्तान र भारत रहेको समूहमा बंगलादेश र न्युजिल्याण्ड पनि छन् । भारतले फेब्रुअरी २० मा बंगलादेशसँग र मार्च २ मा न्युजिल्यान्डसँग खेल्नेछ । यी सबै खेलहरू दुबईमा हुने सम्भावना छ।

साविक विजेता पाकिस्तानले फेब्रुअरी १९ मा कराँचीमा न्युजिल्यान्डसँग खेल्दै प्रतियोगिताको सुरुवात गर्नेछ । पाकिस्तानको अन्तिम लिग खेल बंगलादेशसँग फेब्रुअरी २७ मा रावलपिण्डीमा हुनेछ ।

दोस्रो समूहमा अफगानिस्तान, अस्ट्रेलिया, इङ्ग्ल्यान्ड र दक्षिण अफ्रिका छन् । लाहोर, कराँची र रावलपिण्डीमा भारतका बाहेक दुवै समूहका खेल हुनेछन् ।

प्रतियोगिताको सेमिफाइनल खेलहरु मार्च ४ र मार्च ५ मा हुनेछन् । पहिलो सेमिफाइनलमा रिजर्भ डेको व्यवस्था छैन । दोस्रो सेमिफाइनल खेलमा भने रिजर्भ डेको व्यवस्था छ । मार्च ९ मा हुने प्रतियोगिताको फाइनल खेल हुनेछ । फाइनल खेलमा रिजर्भ डेको व्यवस्था रहेको छ ।

यदि भारतले सेमिफाइनलमा स्थान बनाएमा पहिलो सेमिफाइनल युएईमा खेलाइनेछ । यदि भारत छनोट हुन सकेन भने दुवै सेमिफाइनल खेल पाकिस्तानमा हुनेछ । फाइनल खेल लाहोरमा हुने तय गरिएको छ, जसमा भारतले जित हासिल गरेमा युएईमा आयोजना गर्न सकिने प्रावधान राखिएको छ ।

सन् २०२७ सम्म भारतले आयोजना गर्ने आइसिसी इभेन्ट्समा पाकिस्तानका खेलहरु पनि तटस्थ स्थलमा हुने सहमति भएपछि हाइब्रिड मोडेललाई अन्तिम रुप दिइएको हो ।

यो सम्झौता च्याम्पियन्स ट्रफीबाट सुरु हुनेछ । यो सन् २०२५ मा भारतमा हुने महिला एकदिवसीय विश्वकप तथा सन् २०२६ को पुरुष टि ट्वान्टी विश्वकपमा पनि लागू हुनेछ ।