काठमाडौं (हाम्रो खेलकुद) – एसीसी महिला यू१९ एसिया कप अन्तर्गत सुपर ४ को अन्तिम खेलमा नेपाललाई ९ विकेटले हराउँदै बंगलादेश फाइनलमा प्रवेश गरेको छ ।

मलेसियाको बायुमस ओभलमा वर्षा बाधक बनेपछि खेल ११ ओभरमा घटाइएको थियो । खेलमा जित हासिल गर्ने टोली फाइनल प्रवेश गर्ने समीकरण रहेको थियो । भारतले भने यस खेल अगावै उपाधि भिडन्तमा स्थान बनाएको थियो । नेपालले प्रतियोगितामा तेस्रो स्थानमा चित्त बुझाएको छ ।

टस हारेपछि पहिलो ब्याटिङको निम्तो पाएको नेपालले ११ ओभरमा ८ विकेट गुमाएर ५४ रन जोड्यो । जवाफमा बंगलादेशले दशौं ओभरमा १ विकेट गुमाएर लक्ष्य पूरा गर्यो ।

बंगालदेशका लागि ओपनर फाहोमिदा चोयाले ३ चौकासहित नटआउट २६ रन जोडिन् । अर्की ओपनर मोसमत इभाले २१ बलमा १ छक्कासहित १८ रनको योगदान दिइन् । उनी कुसुमको बलमा बोल्ड भएकी थिइन् ।

त्यसअघि नेपालका लागि ओपनर सावित्री धामीले सर्वाधिक ११ रन जोडिन् । कप्तान पुजा महतो ९ र एलिशा यादवले ८ रन बनाए । नेपालका ४ ब्याटर रनआउट हुन पुगेका थिए ।

पावरप्ले देखि नै रनका लागि संघर्ष गरेको नेपालले ठूलो सट खेल्न सकेन । नेपालका लागि एलिसाले २ तथा सावित्री र पुजाले १-१ चौका प्रहार गरेका थिए ।

सुपर ४ को शीर्षस्थानमा रहेर भारतले फाइनलमा स्थान पक्का गरेको हो । भारतको ७ अंक जोड्दा बंगलादेशले ६ र नेपाल ४ अंक जोड्यो । श्रीलंकाले ३ अंक मात्र जोड्न सक्यो ।