काठमाडौं(हाम्रो खेलकुद) – सिद्धार्थ बैंक नेपाल प्रिमियर लिग(एनपिएल) मा २ अर्धशतकको सहयोगमा विराटनगर किंग्सविरुद्ध कर्णाली याक्सले मध्यम योगफल तयार गरेको छ ।

कीर्तिपुरस्थित टियु मैदानमा शनिवारको दोस्रो खेलमा विराटनगरले कर्णालीबाट १ सय ३४ रनको मध्यम लक्ष्य पाएको हो ।

टस हारेर ब्याटिङको निम्तो पाएको कर्णालीले निर्धारित २० ओभरको अन्तिम बलमा अल आउट हुँदै १ सय ३३ रन मात्र जोड्यो ।

कर्णालीका विलियम बोसिस्टोले सर्वाधिक ६६ रन जोडे । उनले ४९ बलमा ५ चौका र ५ छक्का प्रहार गरेका थिए । ६६ रन जोडेका बोसिस्टो क्रिस सोलले एलबिडब्लु धरापमा पारे ।

ओपनर देव खनालले ४८ बलमा ४ चौका र २ छक्काको सहयोगमा ५३ रन जोडे । एनपिएलमा आफ्नो पहिलो अर्धशतक देवले ४० बलमा पूरा गरेका थिए । ८ बलमा ३ रन जोडेका देव पाँचौ ओभरको पहिलो बलमा प्रतिस जिसीको बलमा सुवास भन्डारीले क्याच मिस गरे । ५३ रन जोड्दै खनाल बसिर अहमदको बलमा क्रिस सोलबाट क्याच आउट भए ।

कर्णालीका ओपनर तथा पुर्व भारतीय टोलीका ओपनर शिखर धवन ५ बलमा ५ रन बनाउँदै आउट भए । धवनलाई प्रतियोगितामा पहिलो पटक नेपाली बलरले आउट गरे । धवनलाई प्रतिस जिसीले दोस्रो ओभरको तेस्रो बलमा बोल्ड आउट गराए । कर्णालीले पछिल्लो सात बलमा ५ विकेट गुमाएको थियो ।

कर्णालीका अन्य खेलाडीले दोहोरो अंकमा रन जोड्न सकेनन् । विराटनगरका लागि अन्तिम ओभरमा ४ विकेट लिदै मेडन ओभर गरेका प्रतिसले ४ ओभरमा १७ रन खर्चिएर ४ विकेट लिए । बसिर अहमद, क्रिस सोलले समान २ तथा अकिब इल्यासले १ विकेट लिए ।

आजै भएको पहिलो खेलमा सुदूरपश्चिम रोयल्सले लुम्बिनी लायन्समाथि ४५ रनको जित हात पारेको थियो ।