काठमाडौं (हाम्रो खेलकुद) – एसीसी यू-१९ एसिया कपमा बुधवार अफगानिस्तानलाई १ विकेटले हराउँदा नेपालका कप्तान हेमन्त धामीले अलराउण्ड प्रदर्शन गर्दै प्लेयर अफ द म्याच पाए । १ सय २४ रनको सामान्य लक्ष्य पछ्याएको खेलमा हेमन्तले अविजित २२ रनको इनिङ खेल्नुको साथै २ विकेट लिए ।

त्यसअघि शारजाहमा टस जितेर पहिला ब्याटिङ रोजेको अफगानिस्तान २७.१ ओभरमा ९१-७ को अवस्थामा थियो । अन्तिम आशाको रुपमा अफगानिस्तानका अल्लाह मोहम्मद घजान्फर थिए । १८ वर्षीय घजान्फर विश्व क्रिकेटकै उदयमान अलराउण्डर हुन् ।

उनले अफगानिस्तानको सिनियर टोलीबाट उनले ८ ओडीआईमा १२ विकेट लिइसकेका छन् । शारजाहमै गत सेप्टेम्बरमा ओडीआईमा बंगलादेशविरुद्ध उनले एकै खेलमा ६ विकेट लिएका थिए । स्पिनसँगै तल्लोक्रममा ठूला सटको क्षमता राख्छन् ।

आइपिएल अक्सनमा उनलाई किन्न अघिल्लो साता मुम्बईले ४ करोड ८० लाख भारु (झण्डै ८ करोड नेपाली रुपैयाँ) खर्च गरेको थियो । न्यूनतम ७५ लाख भारु राखेका उनलाई किन्न मुम्बईसँगै कोलकाता नाइट राइडर्स र रोयल च्यालेन्जर्स बेंगलुरुबीच प्रतिस्पर्धा भएको थियो ।

२८ औं ओभरमा हेमन्त बलिङमा आउनु अघि अफगानिस्तान ८६-७ को अवस्थामा थियो । घजान्फर १ चौकासहित ५ रनमा नटआउट थिए । हेमन्तलाई २८ औं ओभरको पहिलो बलमै उनले छक्का हाने । लेन्थको बललाई मिडविकेटको माथिबाट खेलेका थिए । तर दोस्रो अफसाइडको स्वलो योर्कर बलमा उनी बोल्ड आउट भए । त्यसपछि दौडिएर केही पर गए । अनि बस्दै उनलाई फ्लाइंग किस दिए ।

क्रिकेटमा जति ठूलो नाम त्यतिनै बलरलाई सेलेब्रेसन गर्न मज्जा आउँछ । हेमन्त नेपाली क्रिकेटमा बसेर फ्लाइंग किस गर्ने आफ्नो ट्रेडमार्क बनाउन चाहन्छन् ।

‘आफ्नो ट्रेडमार्क बनाउन यो सेलेब्रेसन गरेको हो । ललित राजवंशी दाइको आकाशतिर गर्ने किस छ । त्यसैले मैले भुईमा बसेर उक्त सेलेब्रेसन गर्दै आफ्नो ट्रेडमार्क बनाउन खोेजेको हो । यस्तो सेलेब्रेसन गर्न पहिला देखिनै खोजेको थिए’, हेमन्तले भने ।

गत जनवरीमा आईसीसी यू१९ विश्वकपमा अफगानिस्तानलाई १ विकेटले हराउँदै नेपाल सुपर सिक्समा पुगेको थियो । अफगानिस्तान सुपर सिक्समा पुग्न नसकेपछि २०२६ को विश्वकप खेल्न छनोट खेल्नुपर्नेछ ।

२०२५ अप्रिलमा हुने एसिया क्षेत्र छनोटमा घरेलु टोली नेपालसँगै ओमान, युएई, हङकङ र अफगानिस्तानबीच प्रतिस्पर्धा हुनेछ । राउण्ड रोविनको आधारमा हुने उक्त छनोटको एक टोली मात्रै २०२६ मा जिम्बावे र नामिबियामा हुने विश्वकप खेल्न पाउनेछन् ।

नेपाल घरेलु मैदान र समर्थकको फाइदा उठाउन चाहन्छ । तर अफगानिस्तान मुख्य विपक्षी देखिन्छ । त्यसमा पनि घजान्फरको प्रदर्शन निकै महत्त्वपूर्ण हुनेछ । त्यसै समयमा आइपिएल रहेकाले उनको अनुपस्थिति रहने सम्भावना भने छ । तर यसै साता उनले यू१९ एसिया कपका क्रममा अफगानिस्तानको खेल नभएको दिन टि१० लिगका खेल खेलेका थिए । त्यसैले भारतमा हुने आइपिएल दौरान उनी नेपाल आएर खेल्ने सम्भावना पनि छ ।

तर हेमन्त खेलाडीको नामले खासै फरक नपर्ने बताउँछन् । ‘यो बारेमा सोचेको छैन । बल बाइ बल खेल्ने हो । बल हेरेर खेल्ने हो । अगाडि आइपिएल खेलेको छ की छैन भन्ने हुँदैन’, उनले भने ।

हेमन्तले पहिलो पटक नेपालको यू-१९ टोलीको कप्तानी गरे । उनको कप्तानीमा एसिया कपमा नेपाल बंगलादेश र श्रीलंकासँग पराजित भयो । अफगानिस्तानलाई भने हराउन सफल भयो । हेमन्त आफूले सोचे जस्तो नतिजा नआएको बताउँछन् ।

‘जुन हिसाबले नेपालबाट आएका थियौ त्यस्तो नतिजा आएन । अफगानिस्तानलाई हराउँदै राम्रो अन्त्य गयौं । यो जितले विश्वकप छनोटमा मनोबल झनै उच्च हुनेछ’, उनले भने ।

हेमन्तले अब नेपाल प्रिमियर लिगमा जनकपुर बोल्ट्सको लागि खेल्नेछन् । उनीसँगै यू१९ टोलीका आकाश त्रिपाठी पनि जनकपुरमै छन् ।