भुपेन्द्र जि.सी.

खेलकुदमा खेलाडीले सेलेब्रेसन खुसी मनाउन गर्दछन् । दुर्भाग्यपूर्ण कहिलेकाहीँ त्यो सेलेब्रेसन आफैंलाई घातक बन्नसक्छ । युएईमा जारी एसिसी यू-१९ एसिया कप २०२४ मा नेपाल र बंगलादेशबीचको खेलकोक्रममा त्यस्तै भयो । तर धेरै समर्थकको ध्यान नेपाल प्रिमियर लिग (एनपिएल) मा हुँदा त्यो घटनाले खासै चर्चा पाएन ।

दुबई अन्तर्राष्ट्रिय क्रिकेट मैदानमा शनिवार १ सय ४२ रनको लक्ष्य पछ्याएको बंगलादेशविरुद्द लेग स्पिनर युवराज खत्रीले २८ औं ओभरको पाँचौ र अन्तिम बलमा लगातार दुई विकेट लिए ।

२७.४ ओभरमा १३४-३ को अवस्थाबाट पाँचौं बल फरिद हसनले विकेटकिपरको पछि सट खेल्न खोज्दा मिस भएपछि अफ स्टम्पमा बल लाग्न पुग्यो। युवराजले त्यो विकेटमा आफ्नो जुत्ता खोलेर फोन गरेको सेलेब्रेसन गरे ।

लगत्तै अर्को बलमा उनले मोहम्मद रिजन हसनलाई शून्यमा एलबिडब्लू आउट गरे । दोस्रो विकेटमा सेलेब्रेसन फरक थियो । दुवै हात फिजाउदै दौडिन थाले । आफ्ना सहकर्मी अभिषेक तिवारीसँग हात मिलाएका उनी त्यतिमै रोकिएनन् । केहि दौडिए र फेरि जम्प गरे । कप्तान हेमन्त धामीसँगै अन्य खेलाडीसँग उक्त विकेटको थप खुसी मनाउन थाले ।

पछाडिबाट अघि फर्किदै जमिनमा टेक्न खोज्दा देब्रे खुट्टा स्पाइक चिप्लियो । त्यसपछि मैदानमा पल्टिए । उनको खुसी एक्कासी पिडामा बदलियो । साथीसँग खुसीमा सेलेब्रेसन गरेका उनलाई उपचार गर्न फिजियो मैदान आउनु पर्यो । फिजियो विक्रम न्यौपानेले प्राथमिक उपचार गरे । तर खेल्न नसकेपछि सहकर्मीको सहायतामा मैदान छाडे ।

उनले मैदान छाडेको चार बल अर्थात् २८.४ ओभरमा नेपाल ५ विकेटले पराजित भयो । नेपालले हारेपनि बंगलादेशविरुद्ध युवराजले ६ ओभरमा १ मेडनसहित २३ रन खर्चेर ४ विकेट लिएका थिए । खेल सकेको एक घण्टापछि टिम मिटिंग भयो । उनको चोट लागेको देब्रे खुट्टा सुनिदै र दुख्दै गयो । त्यसपछि बल्ल उनले अब खेल्न नसक्ने सोच्न थाले ।

आइसिङ, टेपिङ गर्दा पनि खुट्टा पटक्कै ठिक भएन । त्यसपछि त उनले अफगानिस्तानविरुद्धको खेलको आशा मारे । नभन्दै उनले बुधबार भएको अफगानिस्तानविरुद्ध खेल गुमाए । रामोञ्चक लो स्कोरिङ १ सय २४ रनको लक्ष्य नेपालले ५१ बल अघि ९ विकेट गुमाउँदै पूरा गर्यो ।

‘विकेट लिएपछि खुसी लागिहाल्छ । तर सेलेब्रेसन गर्दा त्यस्तो हुन्छ भनेर मैले कल्पना गरेको थिएन । स्पाइक चिप्लिदा ट्वीस्ट भयो’, युवराजले हाम्रो खेलकुदसँग भने ।

पहिलो पटक यू-१९ टोलीमा परेका १७ वर्षीय उनले बिहीबार श्रीलंकासँग डेब्यू गर्दै १० ओभरमा १ मेडनसहित ४४ रन खर्चेर २ विकेट लिए । यसै वर्षको सुरुवातम यू-१९ विश्वकप खेलेका कप्तान हेमन्त धामीसँगै आकाश त्रिपाठी, अर्जुन कुमाल, उत्तमथापा मगरले सम्झाई बुझाई गर्दा पहिलो पटक टोलीमा परे जस्तो दबाब लिनु परेन । अझ मुख्य प्रशिक्षक शक्ति गौचनको प्रशिक्षणबाट धेरै कुरा सिक्न पाएको बताउँछन् ।

‘यू-१९ एसिया कपमा मेरो राम्रो अनुभव रह्यो । नयाँ नयाँ कुरा सिक्न पाइयो । शक्ति सरबाट धेरै कुरा सिक्न पाइयो । विश्वकप खेलेका खेलाडीबाट पनि राम्रो अनुभव रह्यो’, उनले भने ।

दुई खेलमा ६ विकेट लिएका उनी टिमले नजित्दा त्यति खुसी भने छैनन् । ‘मेरो राम्रो भन्दा पनि टिमले सुरुवाती दुई खेल जितेको भए धेरै राम्रो हुन्थ्यो’, उनले भने ।

नेपाली टोली बिहीवार राती स्वदेश फर्कियो । स्वदेश फर्केलगत्तै विस्तृत परिक्षण गरेपछि उनले केही साता खेलबाहिर रहनुपर्ने देखिएको छ । क्यानका फिजियो विक्रम न्यौपानेका अनुसार युवराजको चोट गम्भीर भने रहेको छैन ।

‘एमआरईको रिपोर्टले लिगामेन्टमा सामान्य समस्या देखाएको छ । अब सुन्निएको भाग बसेपछि हामीले रिह्याब सुरु गर्छौं । यो महिनाभित्रमा मैदान पूर्ण रुपमा फर्कनुहुन्छ । विश्वकप छनोटका लागि कुनै डर छैन,’ न्यौपानेले भने ।

अछाम पायलमा जन्मिएका ७ वर्षअघि काठमाडौं आउँदै बुबा लोकेन्द्र खत्रीले सञ्चालन गरेको एन्जल्स क्रिकेट एकेडेमी (बालाजु) मा सिक्न थालेका थिए । त्यसैले उनी सानैदेखि त्यही एकेडेमीबाट क्रिकेट खेलेर हुर्किएका युवा अलराउण्डर हुन् ।

सुदूरपश्चिमबाट घरेलु क्रिकेट खेल्ने धनगढीमा रामचन्द्र शाहीले हरेक वर्ष आयोजना गर्ने लिटिल फ्लावर प्रिमियर लिगबाट यात्रा अघि बढाएका थिए ।

सन् २०२२ मा सुदूरपश्चिमबाट यू-१९ राष्टिय टोलीमा परेपनि १५ वर्ष नपुग्दा सुरुवाती खेल नै खेल्न पाएनन् । अन्तिम समय तिर मात्रै २ खेल खेल्ने अवसर पाएका उनले मधेशसँग डेब्यू गर्दै दुई विकेट लिएका थिए ।

उनले गत अक्टोबरमा विराटनगरमा सम्पन्न यू-१९ राष्ट्रिय प्रतियोगितामा सुदूरपश्चिमलाई च्याम्पियन बनाउन १२ विकेट लिनुको साथै १ सय ४२ रन जोड्दै अलराउण्ड प्रदर्शन गरे ।

स्पिनसँगै तल्लोक्रममा ब्याटिङमा प्रभावित गरेपछि प्रशिक्षक गौचनले उनलाई एसिया कप खेल्ने अन्तिम टोलीमा समेटेका थिए । मौका पाएका दुवै खेलमा युवराजले राम्रो पनि गरे । तर सेलेब्रेसनको कारण अन्तिम खेल भने गुमाउनु पर्यो ।