काठमाडौं(हाम्रो खेलकुद) – कप्तान करण केसीको बिस्फोटक ब्याटिङको सहयोगमा काठमाडौं गुर्खाजले सिद्धार्थ बैंक नेपाल प्रिमियर लिग(एनपिएल) मा पहिलो जित हासिल गरेको छ ।

दोस्रो खेलमा पहिलो जित हात पार्ने क्रममा बुधवार काठमाडौंले कर्णाली याक्सलाई ३ विकेटले पराजित गर्यो ।

१ सय ५० रनको प्रतिस्पर्धात्मक लक्ष्य काठमाडौंले १९.३ ओभरमा ७ विकेट गुमाएर पूरा गर्यो । सुमित महर्जनले नट आउट रहँदै सर्वाधिक ४० रन बनाए । उनले ३७ बलमा ३ चौका र १ छक्काको प्रहार गरे ।

काठमाडौंका लागि जेहार्ड एरास्मसले २८ बलमा ३ चौका र २ छक्काको सहयोगमा ३८ रन बनाए । ओपनर माइकल लेभिटले १९ बलमा २ चौका र १ छक्काको सहयोगमा २२ रन जोडे । लेभिट विपिन शर्माको बलमा लामो शट खेल्ने प्रयासमा बाउन्ड्रीमा नन्दन यादवबाट क्याच आउट भएका थिए ।

करणले १० बलमा २ चौका र २ छक्काको सहयोगमा २८ रन बनाए । ठूलो सट खेल्ने चक्करमा सोमपाल कामीको बलमा बाउन्ड्रीमा देव खनालबाट क्याच आउट भए । ओपनर शंकर राना पहिलो विकेटका रुपमा आउट भए ।

शंकर ७ बलमा ६ रन बनाउँदै रन आउट भए । काठमाडौंले दोस्रो विकेटका रुपमा विदेशी खेलाडी स्टेफन स्किनाजी ६ बलमा ३ रन बनाउँदै नन्दन यादवको एलबिडब्लु धरापमा परे ।

भीम सार्कीले १० बलमा ९ रन जोडे । भीम जिशान मक्शुदको बलमा शिखर धवनबाट क्याच आउट भएका थिए । एक समय ९८ रनमा ५ विकेट गुमाएर हार नजिक पुगेको काठमाडौंका लागि करणको बिस्फोटक ब्याटिङले जित सम्भव बनायो ।

कर्णालीका लागि सोमपाल कामी, जिशान मक्सुद, विपीन शर्मा, नन्दन यादव र गुलशन झाले समान १ रन बनाए ।

त्यसअघि टस हारेर ब्याटिङको निम्तो पाएको कर्णालीले निर्धारित २० ओभरमा ५ विकेट गुमाएर १ सय ४९ रनको योगफल तयार गरेको थियो ।

कर्णालीका लागि ओपनर धवनले नट आउट रहँदै सर्वाधिक ७२ रन जोडेका थिए । उनले ५१ बलमा ४ चौका र ५ छक्का प्रहार गरेका थिए । धवनको एनपिएलमा यो पहिलो अर्धशतक हो । उनले ४२ बलमा अर्धशतक पूरा गरेका थिए ।

ओपनर धवनले २५औं बलमा पहिलो बाउन्ड्रि प्रहार गरेका थिए । उनले पहिलो बाउन्ड्रि १३औं ओभरको चौथो बलमा प्रहार गरेका थिए । उनले पछिल्लो २६ बलमा ५२ रन प्रहार गरे ।

चाल्डिक वाल्टनले १५ बलमा ५ चौकाको सहयोगमा २१ रन जोडे । चौथो ओभरको पाँचौ बलमा वाल्टन जेहार्ड एरास्मसको बलमा करण केसीबाट समातिए । बाबर हायतले १८ बलमा १३ रन जोडे । हायत दीपेश कडेलको बलमा बोल्ड आउट भए ।

गुलशन झाले १९ बलमा १ चौकाको सहयोगमा १२ रन जोडे । उनी जेहार्ड एरास्मसको बलमा विकेट किपर स्टेफन स्किनाजीले स्टपीङ गरे । जिशान मक्सुद ११ बलमा १ चौकाको सहयोगमा १४ रन बनाउँदै नट आउट रहे ।

त्यसअघि चितवन राइनोजविरुद्धको पहिलो खेलमा विकेटविहिन बनेका करण केसीले पहिलो ओभरको तेस्रो बलमा विकेट लिन सफल भए । करणले रनको खाता नखोल्दै देव खनाललाई आउट गराए ।

जनकपुर बोल्ट्ससँगको पहिलो खेलमा ५ बलमा १ रनमा आउट भएका देवले रनको खाता खोल्नै सकेनन् । देव करणको एलबिडब्लु धरापमा परे ।

अर्जुन घर्तीले ३ बलमा १ चौकाको सहयोगमा ४ रन जोडे । अर्जुन नाथन स्वटरको बलमा बोल्ड आउट भए । कर्णालीले पछिल्लो पाँच ओभरमा कुनै विकेट नगुमाइ ५८ रन जोडेका थियो ।

काठमाडौंका लागि जेहार्ड एरास्मसले २ तथा नाथन स्वटर, दीपेश कंडेल र कप्तान करण केसीले समान १ विकेट लिए । आजै हुने दोस्रो खेलमा विराटनगर किंग्सले लुम्बिनी लायन्सको सामना गर्दैछ ।