काठमाडौं(हाम्रो खेलकुद) – ओपनर शिखर धवनको अर्धशतकमा कर्णाली याक्सले सिद्धार्थ बैंक नेपाल प्रिमियर लिग(एनपिएल) मा काठमाडौं गुर्खाजलाई प्रतिस्पर्धात्मक लक्ष्य दिएको छ ।

बुधवारको पहिलो खेलमा कर्णालीले काठमाडौंलाई १ सय ५० रनको प्रतिस्पर्धात्मक लक्ष्य दिएको छ । टस हारेर ब्याटिङको निम्तो पाएको कर्णालीले निर्धारित २० ओभरमा ५ विकेट गुमाएर १ सय ४९ रनको योगफल तयार गरेको हो । कर्णालीका लागि ओपनर धवनले नट आउट रहँदै सर्वाधिक ७२ रन जोडे । उनले ५१ बलमा ४ चौका र ५ छक्का प्रहार गरे । धवनको एनपिएलमा यो पहिलो अर्धशतक हो । उनले ४२ बलमा अर्धशतक पूरा गरेका थिए ।

ओपनर धवनले २५औं बलमा पहिलो बाउन्ड्रि प्रहार गरेका थिए । उनले पहिलो बाउन्ड्रि १३औं ओभरको चौथो बलमा प्रहार गरेका थिए । उनले पछिल्लो २६ बलमा ५२ रन प्रहार गरे । चाल्डिक वाल्टनले १५ बलमा ५ चौकाको सहयोगमा २१ रन जोडे । चौथो ओभरको पाँचौ बलमा वाल्टन जेहार्ड एरास्मसको बलमा करण केसीबाट समातिए । बाबर हायतले १८ बलमा १३ रन जोडे । हायत दीपेश कडेलको बलमा बोल्ड आउट भए ।

गुलशन झाले १९ बलमा १ चौकाको सहयोगमा १२ रन जोडे । उनी जेहार्ड एरास्मसको बलमा विकेट किपर स्टेफन स्किनाजीले स्टपीङ गरे । जिशान मक्सुद ११ बलमा १ चौकाको सहयोगमा १४ रन बनाउँदै नट आउट रहे ।

त्यसअघि चितवन राइनोजविरुद्धको पहिलो खेलमा विकेटविहिन बनेका करण केसीले पहिलो ओभरको तेस्रो बलमा विकेट लिन सफल भए । करणले रनको खाता नखोल्दै देव खनाललाई आउट गराए । जनकपुर बोल्ट्ससँगको पहिलो खेलमा ५ बलमा १ रनमा आउट भएका देवले रनको खाता खोल्नै सकेनन् । देव करणको एलबिडब्लु धरापमा परे ।

अर्जुन घर्तीले ३ बलमा १ चौकाको सहयोगमा ४ रन जोडे । अर्जुन नाथन स्वटरको बलमा बोल्ड आउट भए । कर्णालीले पछिल्लो पाँच ओभरमा कुनै विकेट नगुमाइ ५८ रन जोडेका थियो । काठमाडौंका लागि जेहार्ड एरास्मसले २ तथा नाथन स्वटर, दीपेश कंडेल र कप्तान करण केसीले समान १ विकेट लिए । आजै हुने दोस्रो खेलमा विराटनगर किंग्सले लुम्बिनी लायन्सको सामना गर्दैछ ।