एजेन्सी – युएईमा जारी यु १९ एसिया कपमा पाकिस्तानले भारतलाई पराजित गरेको छ ।

पाकिस्तानले शनिवार भारतलाई ४३ रनले पराजित गरेको हो । २ सय ८२ रनको लक्ष्य पछ्याएको भारत ४७.१ ओभरमा २ सय ३८ रन जोड्दै अल आउट भयो ।

भारतका निखिल कुमारले ७७ बलमा ६७ तथा मोहम्मद इनानले २२ बलमा ३० रन जोडे ।

पाकिस्तानका लागि अलि राजाले ३,अब्दुल सुवान र फहम उल हकले समान २ तथा नभिद खान र उस्मान खानले समान १ विकेट लिए ।

त्यसअघि दुवई अन्तर्राष्ट्रिय क्रिकेट स्टेडियममा टस जितेर ब्याटिङ गरेको पाकिस्तानले निर्धारित ५० ओभरमा ७ विकेट गुमाएर २ सय ८१ रन बनाएको थियो ।

पाकिस्तानका लागि ओपनर शाहजिब खानले सर्वाधिक १ सय ५९ रन जोडेका थिए । उनले १ सय ४७ बलमा ५ चौका र १० छक्का प्रहार गरेका थिए ।

अर्का ओपनर यस्मान खानले ९४ बलमा ६० रन जोड्नु बाहेक अन्य ब्याटरले उल्लेखनिय प्रदर्शन गर्न सकेनन् ।

भारतका लागि सम्राट नागराजले ३,आयुष महतराले २ तथा युद्धजित गुहा र किरण चोरम्लेले समान १ विकेट लिए ।

समूह ‘बी’ मा रहेको नेपाल शुक्रवार भएको पहिलो खेलमा श्रीलंकासँग ५५ रनले पराजित भएको थियो ।नेपालले आफ्नो दोस्रो खेलमा आइतवार बंगलादेशको सामना गर्नेछ ।