एजेन्सी – घरेलु टोली अस्ट्रेलिया र भारतबीचको बोर्डर गावास्कर ट्रफी अन्तर्गतको पहिलो टेस्टको पहिलो दिनै १७ विकेटको पतन भएको छ ।

अस्ट्रेलियामा शुक्रवारबाट सुरु पहिलो टेस्टको पहिलो दिनमा दुवै टोलीको गरेर १७ विकेट पतन भएको हो । अस्ट्रेलियाको पर्थमा टस जितेर पहिले ब्याटिङ गरेको भारत पहिलो इनिङमा १ सय ५० रन बनाउँदै अल आउट भयो ।

भारतका लागि यसै खेलबाट टेस्ट डेब्यु गरेका नितिश कुमार रेड्डीले ५९ बलमा सर्वाधिक ४१ रन जोडेका थिए । रिषभ पन्तले ७८ बलमा ३७, ओपनर केएल राहुलले ७४ बलमा २६ तथा धुव्र जुरेलले २० बलमा ११ रन बनाएका थिए ।

अस्ट्रेलियाका लागि जस हेजलवुडले ४ तथा मिचेल स्टार्क, प्याट कमिन्स र मिचेल मार्शले समान २ विकेट लिए ।

शुक्रवार नै पहिलो इनिङको सुरुवात गरेको अस्ट्रेलियाले खराब सुरुवात गरेको छ । पहिलो दिनको समाप्तीसम्म अस्ट्रेलियाले सात विकेट गुमाएर ६७ रन मात्र बनाएको छ । अस्ट्रेलियाका एलेक्स केरी १९ र मिचेल स्टार्क ६ रनमा नट आउट रहेका छन् ।

त्यसअघि अस्ट्रेलियाका लागि ट्राविस हेडले १३ बलमा ११ तथा नाथन म्याकस्वेनेले १३ बलमा १० रन जोडेका थिए । भारतका लागि कप्तान जसप्रित बुमराहले ४, मोहम्मद सिराजले २ तथा हर्षित रानाले १ विकेट लिएका थिए ।

बोर्डर गावास्कर ट्रफी अन्तर्गतको पाँच खेलको टेस्ट सिरिजका लागि भारत अस्ट्रेलिया भ्रमणमा रहेको छ ।