काठमाडौं (हाम्रो खेलकुद) – कप्तान हेमन्त धामी र स्पिनर नरेन साउदले उत्कृष्ट बलिङ गर्दा नेपाल यू१९ले कर्नाटकविरुद्ध जारी अभ्यास सिरिजको दोस्रो खेलमा सामान्य लक्ष्य पाएको छ ।

मुलपानी क्रिकेट मैदानमा टस जितेर पहिलो ब्याटिङ रोजेको कर्नाटक यू१९ले ३८.१ ओभरमा अलआउट हुनुअघि १ सय २१ रनमात्र जोड्यो । एक समय ९९-३ को स्थितिमा रहेको कर्नाटकले त्यसपछि सम्हालिन नसक्दा २२ रनको अन्तरमा ७ विकेट गुमायो ।

ओपनर प्रतिकले ३७ र रिशाभले ४० रन जोड्नुबाहेक अन्यले दोहोरो अंकमा रन जोड्न सकेनन । तेस्रो ओभरमा गगन राव२ रन जोड्दै दयानन्द मण्डलको एलबीडब्लु धरापमा परे । आठौं ओभरमा हेमन्तले शिभलाई ८ रनमा विकेटकिपरबाट क्याच गराए ।

त्यसपछि प्रतिक र रिशभले तेस्रो विकेटका लागि ४८ रनको साझेदारी गरे । नरेनले प्रतिकलाई क्याच आउट गराएपछि कर्नाटकको विकेट पतन सुरु भएको थियो । उनी आउट हुँदा स्कोर ७०-३ रहेको थियो ।

२७ औं ओभरमा ९९-३ को स्थितिबाट नरेनले लगातार विकेट लिँदै कर्नाटकलाई १०८-७ को स्थितिमा पुर्याए । त्यसपछि हेमन्तले अन्तिम ३ विकेट लिँदै १ सय २१ रनमा अलआउट गरे ।

नरेनले आफ्नो १० ओभरको स्पेलमा ३ मेडनसहित २० रन खर्चेर ४ विकेट लिए । हेमन्तले ५.१ ओभरमा १ मेडनसहित १६ रन खर्चेर ४ विकेट नै हात पारे । अर्को विकेट सन्तोष यादवको नाममा रह्यो ।

पहिलो खेलमा कर्नाटक १ विकेटले विजयी रहेको थियो । सिरिजको ५ खेल हरेक खेलपछि एक दिन विश्राममा हुनेछ ।