काठमाडौं(हाम्रो खेलकुद) – पाकिस्तानका क्रिकेटर सोयब मक्सुदले जनकपुर बोल्ट्सबाट नेपाल प्रिमियर लिग (एनपिएल) को पहिलो संस्करण खेल्ने भएका छन् ।

जनकपुरले पाँचौ विदेशी खेलाडीको रुपमा पाकिस्तानका ब्याट्सम्यान मक्सुदलाई टोलीमा अनुबन्ध गरेको सोमवार सामाजिक संजालमार्फत जनाएको छ ।

३७ वर्षिय मक्सुदले पाकिस्तानका लागि २९ ओडिआई तथा २६ टि ट्वान्टी आई खेलेका छन् । मक्सुदले १ सय ७० टि ट्वान्टीमा ३ हजार ९ सय २८ रन बनाएका छन् ।

जनकपुरले यसअघि न्युजिल्याण्डका जिमी निशम, अमेरिकाका जोशुवा ट्रम्प, अमेरिकाका मोहम्मद मोहसिन र अर्का अमेरिकी क्रिकेटर लाहिरु मिलन्थालाई अनुबन्ध गरेको थियो ।

नेपाली राष्ट्रिय क्रिकेट टोलीका विकेटकिपर ब्याटर आसिफ शेख मार्की खेलाडी रहेको जनकपुरमा पुबुदु दासानायके मुख्य प्रशिक्षकको जिम्मेवारीमा छन् ।

नेपाल क्रिकेट संघ (क्यान) को आयोजनामा मंसिर १५ देखि पुस ६ गतेसम्म हुने एनपिएलमा ८ टोलीले प्रतिस्पर्धा गर्नेछन् । सहभागी टोलीले समान ४ विदेशी खेलाडी अनुबन्ध गर्न पाउने छ ।

जनकपुर बोल्ट्सको टोली

आसिफ शेख, अनिलकुमार शाह, ललितनारायण राजवंशी, रुपेश सिंह, अरनिको यादव, शुभ कशांकार, तुल बहादुर थापा, किशोर महतो शेर मल्ल, हेमन्त धामी, आकाश त्रिपाटी, जिमी निशम, जोशुवा ट्रम्प, मोहम्मद मोहसिन, लाहिरु मिलन्था र सोयब मक्सद।