एजेन्सी – अल्लाह गजान्फरले ६ विकेटको लिएपछि अफगानिस्तानले पहिलो ओडिआईमा बंगलादेशलाई पराजित गरेको छ ।

युएईको सारजहामा बुधवार भएको खेलमा बंगलादेश ९२ रनले पराजित भएको हो । अफगानिस्तानले ३ ओडिआई सिरिजमा १–० को अग्रता बनाएको छ।

२ सय ३६ रनको लक्ष्य पछाएको बंगलादेशले ३४.३ ओभरमा अल आउट हुँदै १ सय ४३ रन मात्रै बनाउन सक्यो।

बंगलादेशका कप्तान नजमुल हुसेन शान्तोले ६८ बलमा सर्वाधिक ४७ रन बनाए। यस्तै, सौम्य सरकारले ३३, मेहदी हसन मिराजले २८ रन बाहेक अन्यले दोहोरो अंकमा रन जोड्न सकेनन् ।

एक समय १ सय २० रनमा २ विकेट गुमाएर बलियो स्थितिमा रहेको बंगलादेशले २३ रन जोड्दा ८ विकेट गुमाएको थियो ।

अफगानिस्तानको गजन्फरले ६.३ ओभरमा एक मेडन ओभरसहित २६ रन खर्चिएर ६ विकेट हात लिए । ओडिआई करियरमा यो उनको उत्कृष्ट बलिङ हो । राशिद खान २ तथा मोहम्मद नाबी र अजमातुल्लाह उमराजाईले समान १ विकेट लिए।

त्यसअघि टस जितेर पहिले ब्याटिङ गरेको अफगानिस्तानले ४९.४ ओभरमा अलआउट हुँदै २ सय ३५ रन जोड्न सक्यो ।

अफगानिस्तानका मोहमद नाबीले ७९ बलमा ४ चौका र ३ छक्काको सहयोगमा ८४ रनको सानदार अर्धशतकीय पारी खेलेका थिए । ७१ रनमा ५ विकेट गुमाएर कमजोर स्थितिमा पुगेको अफगानस्तानका लागि नाबी र कप्तान हशमतुल्लाह शाहीदीले १ सय ४ रनको महत्वपूर्ण शतकीय साझेदारी गरे ।

कप्तान शाहिदी ९२ बलमा ५२ रन बनाउँदा गुलबदिन नाबी २२, सादिकुल्लाह अटलले २१ रन बनाए । नङ्गेलिया खरोटे २७ रनमा अविजित रहे।

बंगलादेशको लागि तस्किन अहमद र मुस्ताफिजुर रहमानले समान ४ तथा शरिफुल ईस्लामले १ विकेट हात पारे।

दुई टोलीबीचको दोस्रो ओडिआई खेल शनिवार हुनेछ ।