काठमाडौं(हाम्रो खेलकुद) – २०औं द हङकङ सिक्सेस प्रतियोगितामा नेपालले आफ्नो दोस्रो खेलमा शनिवार अस्ट्रेलियाको सामना गर्दैछ ।

खेल मिसन रोड ग्राउण्डमा नेपाली समय अनुसार शनिवार बिहान ६ः१५ बजे सुरु हुनेछ । १ पटकको च्याम्पियन अस्ट्रेलियासॅंग प्रतियोगितामा पहिलो पटक सहभागी नेपालले खेल्न लागेको हो ।

खेलमा अस्ट्रेलियाको कप्तानी अलराउन्डर ड्यान क्रिस्टियनले गर्नेछन् । नेपाली टोली सन्दीप जोराको कप्तानीमा रहेको छ ।

पहिलो खेलमा दुवै टोलीले इङ्ग्ल्याण्डलाई पराजित गर्दै क्वाटरफाइनलमा स्थान पक्का गरिसकेका छन् । नेपालले क्वाटरफाइनलमा शनिवार श्रीलंकाको सामना गर्नेछ ।

नेपाल‌ र अस्ट्रेलियाको खेलबाट समूह विजेता र उप विजेताको टुंगो लाग्नेछ । खेलको जित्ने टोली समूह विजेता र पराजित हुने टोली उप विजेता हुनेछन् ।

प्रतियोगितामा नेपाल समूह बी मा अस्ट्रेलिया र इङ्ग्ल्याण्डसँग रहेको छन् । प्रतियोगितामा सहभागी १२ टोलीलाई ४ समूहमा विभाजन गरिएको छ ।

समूह ‘ए’ मा साविक विजेता दक्षिण अफ्रिका, न्युजिल्यान्ड र हङकङ छन्।

समूह ‘सी’ मा भारत, पाकिस्तान र युएई तथा समूह डी मा श्रीलंका, बंगलादेश र ओमान छन् । हरेक समूहका शीर्ष २ टोली क्वाटरफाइनलका लागि छनोट हुनेछन् ।

प्रतियोगिताको सेमिफाइनल र फाइनल खेल कात्तिक १८ गते हुनेछ । सन् २०१७ मा भएको प्रतियोगिताको पछिल्लो संस्करणमा पाकिस्तानलाई पराजित गर्दै दक्षिण अफ्रिका विजेता बनेको थियो । प्रतियोगिताका खेलहरुमा हरेक टोलीबाट छ खेलाडी सहभागी हुनेछन् ।

नेपाली टोली – सन्दीप जोरा(कप्तान), लोकेश बम, नारायण जोशी, दिपेन्द्र रावत, प्रतिस जिशी, राशिद खान र विवेक यादव

मुख्य प्रशिक्षक – ज्ञानेन्द्र मल्ल