काठमाडौं (हाम्रो खेलकुद) – सन्तोष यादवको अलराउन्ड प्रदर्शनमा लुम्बिनी प्रदेशले नरेश मेमोरियल राष्ट्रिय यु १९ क्रिकेट प्रतियोगितामा विजयी सुरुवात गरेको छ ।

सोमवार भएको खेलमा लुम्बिनी प्रदेशले ७५ रनको जित हात पार्यो । लुम्बिनीले दिएको १ सय ३६ रनको लक्ष्य पछ्याएको कोशीले २४.२ ओभरमा अलआउट हुदै ६० रन मात्र बनाउन सक्यो । कोशीका लागि सोनु अन्सारीले १७, रोशन शाहले १३ तथा आषिश मगरले ११ रन बनाउँनु बाहेक अन्य ब्याटरले दोहोरो अंकमा रन बनाउँन सकेनन् । लुम्बिनीका लागि महेश भार, रमेश कुर्मी र सन्तोष यादवले समान ३ विकेट लिए ।

त्यसअघि गिरीजा प्रसाद कोइराला क्रिकेट स्टेडियममा टस जितेर पहिले ब्याटिङ गरेको लुम्बिनीले ४१.२ ओभरमा अल आउट हुदै १ सय ३५ रन बनाएको थियो । सन्तोष यादवले सर्वाधिक ३६, दिल्साद अलिले ३२, समिर अलिले १२ तथा कप्तान आकाश त्रिपाटीले ११ रन जोडे । कोशीका लागि प्रतिक पोखरेलले ३, विपिन महतो, सौजन्य घिमिरे र प्रेम कामतले समान २ तथा रोशन शाहले १ विकेट लिए ।

पहिलो खेलमा जित निकालेको लुम्बिनीको २ अंक भएको छ । दोस्रो खेलमा पनि पराजित कोशी अंक बिहीन रहेको छ । आजै भएको पहिलो खेलमा गण्डकी प्रदेशले मधेश प्रदेशलाई पराजित गरेको थियो । कार्तिक २१ सम्म चल्ने प्रतियोगितामा ७ प्रदेशको सहभागीता छ । सिङ्गल राउण्ड रोविनमा हुने प्रतियोगिताको शीर्ष २ टोली फाइनल खेल्नेछन् ।