एजेन्सी – इन्डियन प्रिमियर लिग(आइपिएल) २०२२ देखि लखनउ सुपर जायन्ट्सका कप्तान रहेका केएल राहुललाई टोलीले रिटेन गर्ने सम्भावना कम देखिएको छ ।

यदि लखनउले रिटेन नगरेमा राहुल सन् २०२५ को सिजन अघि हुने मेगा अक्सनमा उपलब्ध हुनेछन् ।

लगातार दुई सिजन प्लेअफमा स्थान बनाएको लखनउ सन् २०२४ को आइपिएलमा सातौं स्थानमा रहेपछि राहुलको कप्तानीमा प्रश्न उठेको थियो ।

राहुल लखनउका लागि सर्वाधिक रनकर्ता हुन् । उनले आइपिएल २०२२ मा ६ सय १६ रनका साथ सर्वाधिक रन बनाउने खेलाडीको दोस्रो स्थानमा थिए । चोटका कारण २०२३ सिजनको दोस्रो हाफ गुमाएका थिए । २०२४ मा ५ सय २० रनका साथ लखनउको शीर्ष रनकर्ता बनेका थिए ।

राहुलले रन बनाए पनि उनको स्ट्राइक रेटमा भने सधै प्रश्न उठ्ने गर्दछ ।

गत सिजन सनराइजर्स हैदरावादसँग हार बेहोरेपछि लखनउका मालिक सञ्जीव गोयन्काले राहुलसँग मैदानमै असन्तुष्टि पोखेका थिए । टेलिभिजनमा देखिएको राहुलसँग गोयन्काको कुराकानीले उनको भविष्यलाई लिएर अड्कलबाजी सुरु गरेको थियो । यद्यपि, गोयन्काका अनुसार राहुलसँग उनको कुराकानी सौहार्दपूर्ण थियो।

गत अगस्टमा कोलकातामा भारतका पूर्व तीव्र गतिका बलर जहिर खानलाई मेन्टर घोषणा गर्न आयोजित कार्यक्रममा गोयन्काले राहुललाई लखनउको परिवारको महत्वपुर्ण सदस्य भनेका थिए ।

अक्टोबर ३१ मा १० फ्रेन्चाइजीले आइपिएलमा रिटेन खेलाडीको सूची बुझाउनु पर्नेछ । सन् २०२५ को सिजनका लागि हुने मेगा अक्सन हुँदैछ । अक्सन अघि हरेक टोलीले बढीमा ६ जनासम्म खेलाडी रिटेन गर्न सक्नेछन् ।