काठमाडौं (हाम्रो खेलकुद )- रुपन्देहीको भैरहवामा जारी बिपी कोइराला स्मृति कप टि-ट्वान्टी प्रतियोगिताको दोश्रो दिन आइतवार दुई खेलमा भारतको लाईफ केयर क्रिकेट क्लब र बंगलादेशको साइक क्रिकेटर्स विजयी भएका छन्। 

पहिलो खेलमा भारतको लाईफ केयरले लगातार दोश्रो जित निकाल्ने क्रममा स्थानीय टोली नेक्सस रुपन्देही एघारलाई ७ विकेटले पराजित गर्यो। 

१ सय ३४ रनको लक्ष्य लाइफ केयरले मात्र ३ विकेट क्षेतिमा ३.३ ओभर बाँकी रहँदै भेटायो। लाईफ केयरको जितमा ओपनर दिपक पुनियाले सर्वाधिक ६० रन बनाए । उनले ४३ बलमा ५ चौका र ३ छक्का प्रहार गरे।

प्लेयर अफ द म्याच घोषित भएका पुनियाले अघिल्लो खेलमा पनि अर्धशतक बनाएका थिए। राजेश शर्माले अविजित ३७ रन तथा विपुल कम्बोजले ३२ रन बनाए।
नेक्सस रुपन्देहीका शाहब आलमले २ तथा बसिर अहमदएले १ विकेट लिए।

त्यस अघि टस हारेर ब्याटिङ गरेको नेक्सस रुपन्देहीले २० ओभरमा ६ विकेट गुमेर १ सय ३३ रन बनायो।
ओपनर आकाश त्रिपाठीले सर्वाधिक ४८ रन बनाए । उनले ४३ बलमा ५ चौका प्रहार गरे।

सुमित महर्जन र बसिर अहमदले समान २८ रन बनाए। अघिल्लो खेलमा अर्धशतक बनाएका शंकर रानाले २ रन मात्र बनाउन सके।

लाईफ केयरको बलिङमा योगेश कुमारले सर्वाधिक ३ विकेट लिए । शुभम लाम्बा, हिमांशु र विपुल कम्बोजले समान १ विकेट लिए।

दोश्रो खेलमा बंगलादेशको साइक क्रिकेटर्सले पाकिस्तानको जावेद गोहर इन्टरनेसनल क्रिकेट एकेडेमीलाई ४२ रनले हराउँदै विजयी सुरुवात गर्यो। पाकिस्तानी टिमको यो लगातार दोश्रो हार हो। 

१ सय ४८ रनको लक्ष्य पछ्याएको जावेद गोहरले १८.२ ओभरमा १ सय ५ रनमा सबै विकेट गुमायो।      
ओपनर अलि हुसेनले सर्वाधिक ३४ रन बनाए। जईम खानले १९ तथा शमुन इक्बालले १८ रन बनाए। पाकिस्तानी पूर्व राष्ट्रिय क्रिकेटर इमरान नाजिरले भने १ रन मात्र बनाउन सके। 

साइक क्रिकेटर्सका लागि शहादत सोम्रतले सर्वाधिक ३ , रकिब र मुलेरले समान २ तथा शाहबाज र एकेएसले समान विकेट लिए। 

यस अघि टस हारेर ब्याटिङ गरेको साइक क्रिकेटर्सले १९.५ ओभरमा सबै विकेट गुमाएर १ सय ४७ रन बनाएको थियो। 

साइकको लागि ओपनर मुलेरले सर्वाधिक ४६ रन बनाए। उनले २८ बलमा ४ चौका र ३ छक्का प्रहार गरे। मुनिम शाहरियरले २७, सौरबले २५ तथा रानाले १७ रन बनाए। 

जावेद घर एकेडेमीको बलिङमा रिशभ जोशीले सर्वाधिक ३ , कप्तान इमरान नाजिर र अब्बास अलिले समान २ विकेट लिए।  

प्रतियोगितामा सोमवार पनि दुई खेल हुनेछन्। पहिलो खेल श्रीलंका स्टेट सर्भिस क्रिकेट एसोसिएसन र बंगलादेशको साइक क्रिकेटर्स बीच हुने छ। दोस्रो खेल नेपालको नेक्सस रुपन्देही ११ र पाकिस्तानको जावेद गोहर इन्टरनेसनल क्रिकेट एकेडेमी बीच हुनेछ। 

नेक्सस क्रिकेट एकेडेमीद्वारा आयोजित प्रतियोगितामा दक्षिण एसियाली चार वटा टेस्ट राष्ट्र भारत, पाकिस्तान, श्रीलङ्का, बंगलादेश र नेपालसहित ५ देशका क्लबको सहभागिता छ। प्रतियोगिता लिग कम नक आउट फर्म्याटमा भइरहेको छ।

स्पोर्टस टुरिजमलाई प्रवर्द्धन गर्ने उद्देश्यका साथ आयोजना गरिएको प्रतियोगिताको विजेताले ५ लाख, दोश्रो टोलीले ३ लाख रुपैयाँ प्राप्त गर्नेछ।
म्यान अफ द सिरिजले ३५ हजार, वेस्ट बलरले २० हजार, प्रत्येक खेलको प्लेयर अफ द म्याचले ५ हजार रुपैयाँ पुरस्कार पाउनेछन्।