एजेन्सी – सरफराज खानको शतकका बाबजुद घरेलु टोली भारतले पाहुना टोली न्युजिल्यान्डलाई सामान्य लक्ष्य दिएको छ ।

भारतले पहिलो टेस्ट जितका लागि पाहुना टोलीलाई १ सय ७ रनको सामान्य लक्ष्य दिएको हो । घरेलु टोली पहिलो ईनिङमा ३ सय ५६ रनले पछि परेको थियो । दोस्रो इनिङमा घरेलु टोलीले ४ सय ६२ रन मात्र जोड्न सके पछि न्युजिल्यान्डले सामान्य लक्ष्य पाएको हो ।

सुरुवात राम्रो गरेको भारतका लागि मध्यक्रमका ब्याटर चल्न सकेनन् । घरेलु टोलीले ४ सय ८ रनमा ३ विकेट गुमाएको अवस्थाबाट ५४ रन जोड्दा बाँकी ७ विकेट गुमायो ।

घरेलु टोलीका लागि सरफराजले १ सय ५०, ऋषभ पन्तले ९९, विराट कोहलीले ७० तथा कप्तान रोहित शर्माले ५२ रन जोडे । पाहुना टोलीका लागि रचिन रविन्द्रको शतक सहयोगमा पाहुना टोलीले पहिलो इनिङमा फराकिलो अग्रता कायम गरेको थियो ।

३ टेस्ट सिरिजका लागि भारत भ्रमणमा रहेको न्युजिल्यान्डले पहिलो इनिङमा ३ सय ५६ रनको अग्रता लिएको थियो । पहिलो इनिङमा पाहुना टोलीका लागि म्याट हेनरी र विलियम ओरोर्कले समान ३, अजाज पटेलले २ तथा टिम साउथी र ग्लेन फिलिप्सले समान १ विकेट लिए ।

त्यसअघि वर्षाका कारण पहिलो दिनको खेल पूर्ण रुपले प्रभावित भएकोले दोस्रो दिन मात्र टस सम्भव भएको थियो । भारतको बेंगलुरुमा टस जितेर ब्याटिङ सुरुवात गरेको घरेलु टोली पहिलो इनिङमा ४६ रनमा समेटियो ।

घरेलु टोलीका लागि विकेट किपर ब्याटर ऋषभ पन्तले सर्वाधिक २० तथा ओपनर यशस्वी जैसवालले १३ रन जोडे । मोहम्मद सिराज ४ रनमा नट आउट रहे । भारतका लागि २ ब्याटर बाहेक अन्यले दोहोरो अंक रन जोड्न नसक्दा ४ खेलाडीले रनको खाता नै खोल्न सकेनन् ।

भारतको टेस्ट इतिहासमा कुनै पनि इनिङमा बनेको यो तेस्रो कम योगफल हो । पहिलो इनिङमा भारतले बनाएको यो सबैभन्दा कमको योगफल हो । भ्रमणकारी टोलीका लागि म्याट हेनरी १३.२ ओभरमा १५ रन खर्चिएर ५ विकेट लिए । विलियम ओरोर्कले ४ तथा टिम साउथीले १ विकेट लिए ।

दोस्रो इनिङमा पाहुना टोलीले ४ सय २ रन बनाउँदै ३ सय ५६ रनको अग्रता लिएको थियो । टोलीका लागि रचिन रविन्द्रले १ सय ३४ रनको शतकीय इनिङ खेल्दा ओपनर डेभन कन्वेले सर्वाधिक ९१, टिम साउथीले ६५, विल योंगले २९ तथा कप्तान टम लाथमले १५ रन जोडेका थिए ।

घरेलु टोलीका लागि रविन्द्र जडेजा र कुलदिप यादवले समान ३, मोहम्मद सिराजले २ तथा जसप्रित बुमराह र रविचन्द्रन आश्विनले समान १ विकेट लिए ।