एजेन्सी – घरेलु टोली पाकिस्तानले इङ्ग्ल्यान्डलाई दोस्रो दोस्रो टेस्टमा पराजित गरेको छ । मुल्तान क्रिकेट स्टेडियममा शुक्रवार सकिएको दोस्रो टेस्ट घरेलु टोलीले १ सय ५२ रनको अन्तरले जितेको हो ।

पहिलो टेस्टमा इङ्ग्ल्यान्डले १ इनिङ र ४७ रनले जितेको थियो । दोस्रो खेलको नतिजापछि ३ टेस्टको सिरिजमा १-१ को बराबरी भएको छ ।

२ सय ९७ रनको लक्ष्य पछ्याएको इङ्ग्ल्यान्डले १ सय ४४ रन मात्र जोड्न सक्यो । पाहुना टोलीका लागि कप्तान बेन स्टोक्सले ३६ बलमा सर्वाधिक ३७, ब्रायडन कार्सले २७, ओलि पोपले २२ तथा जो रुटले १८ रन जोडे । घरेलु टोलीका लागि नुमान अलिले १६.३ ओभरमा ४६ रन खर्चिएर ८ विकेट लिए । साजिद खानले २ विकेट लिए ।

बेन डुकेटको शतकका बाबजुद पाहुना टोलीले पहिलो इनिङमा २ सय ९१ रन मात्र जोड्न सक्यो ।

टोलीका लागि डुकेटले १ सय २९ बलमा १ सय १४, जो रुटले ३४, ओली पोपले २९, ज्याक क्रलीले २७ तथा ज्याक लिचले नट आउट २५ रन बनाए । पाकिस्तानका लागि साजिद खानले २६.२ ओभरमा १ सय ११ रन खर्चिएर ७ विकेट लिए । नोमान अलिले ३ विकेट लिए । पहिलो इनिङमा इङ्ग्ल्यान्ड ७५ रनले पछि परेको थियो ।

दोस्रो इनिङमा पाकिस्तानले २ सय २१ रन मात्र जोड्न सक्यो । टोलीका लागि सलमान आगाले सर्वाधिक ६३, साउद सकिलले ३१, कमरान गुलामले २६, सइम अबयु र साजिद खानले समान २२ तथा कप्तान शान मक्सुदले ११ रन जोडेका थिए ।

भ्रमणकारी टोलीका लागि शोयब बसिरले ४, ज्याक लिचले ३ तथा म्याथ्यु पोटले १ विकेट लिए । घरेलु टोलीले दोस्रो इनिङमा २ सय ९६ रनको अग्रता लिएको थियो ।

त्यसअघि टस जितेर ब्याटिङ रोजेको घरेलु टोलीले कमरान गुलामले डेब्यु खेलमा नै शतक प्रहार गरेपछि ३ सय ६६ रन बनाएको थियो ।

दुई देशबीचको तेस्रो टेस्ट बिहीवारबाट रावलपिन्डीमा सुरु हुनेछ ।