एजेन्सी – न्युजिल्यान्डसँगको पहिलो टेस्टको पहिलो इनिङमा भारत ४६ रनमा नै अल आउट भएको छ । न्युजिल्यान्ड ३ टेस्ट सिरिजका लागि भारत भ्रमणमा रहेको छ ।

वर्षाका कारण पहिलो दिनको खेल पूर्ण रुपले प्रभावित भएकोले दोस्रो दिन बिहीवार मात्र टस सम्भव भएको थियो । भारतको बेंगलुरुमा टस जितेर ब्याटिङ सुरुवात गरेको घरेलु टोली पहिलो इनिङमा ४६ रनमा समेटियो ।

घरेलु टोलीका लागि २ ब्याटर बाहेक अन्यले दोहोरो अंक रन जोड्न नसक्दा ४ खेलाडीले रनको खाता नै खोल्न सकेनन् ।

भारतको टेस्ट इतिहासमा कुनै पनि इनिङमा बनेको यो तेस्रो कम योगफल हो । पहिलो इनिङमा भारतले बनाएको यो सबैभन्दा कमको योगफल हो ।

घरेलु टोलीका लागि विकेट किपर ब्याटर रिषभ पन्तले सर्वाधिक २० तथा ओपनर यशस्वी जैसवालले १३ रन जोडे । मोहम्मद सिराज ४ रनमा नट आउट रहे । भ्रमणकारी टोलीका लागि म्याट हेनरी १३.२ ओभरमा १५ रन खर्चिएर ५ विकेट लिए । विलियम ओरोर्कले ४ तथा टिम साउथीले १ विकेट लिए ।

आजनै पहिलो इनिङको सुरुवात गरेको पाहुना टोलीले दोस्रो दिनको खेल सकिँदा ३ विकेट गुमाएर १ सय ८० रन बनाएको छ । पाहुना टोलीका रचिन रविन्द्र २२ तथा ड्यारिल मिचेल १४ रनमा क्रिजमा छन् । त्यसअघि ओपनर डेभन कन्वेले सर्वाधिक ९१, विल योंगले २९ तथा कप्तान टम लाथमले १५ रन जोडेका थिए ।

घरेलु टोलीका लागि रविचन्द्रन आश्विन, रविन्द्र जडेजा र कुलदिप यादवले समान १ विकेट लिए । पाहुना टोलीले दोस्रो दिनको खेल सकिदा पहिलो इनिङमा १ सय ३४ रनको अग्रता कायम गरिसकेको छ ।