काठमाडौं (हाम्रो खेलकुद) – नेपाल प्रिमियर लिग (एनपिएल) टोली विराटनगर किंग्सले आयरल्यान्डका पुर्व क्रिकेटर केबिन ओ ब्राइनलाई प्रमुख प्रशिक्षकमा नियुक्त गरेको छ ।

विराटनगरले बिहीवार सामाजिक संजाल मार्फत ओ ब्राइनलाई प्रमुख प्रशिक्षकको जिम्मेवारी दिइएको जानकारी गराएको हो । ओ ब्राइनले आयरल्यान्डबाट ३ टेस्ट, १ सय ५३ ओडिआई र १ सय १० टि ट्वान्टी आई खेलेका छन् । ओ ब्राइन आयरल्यान्डका लागि तीनै फर्म्याटमा शतक प्रहार गर्ने एक मात्र खेलाडी हुन् ।

विराटनगरको मार्की खेलाडीका रुपमा राष्ट्रिय क्रिकेट टोलीका क्रिकेटर सन्दीप लामिछाने छन् । एनपिएलको अक्सन गत आइतवार भएको थियो । अक्सनबाट सहभागी हरेक टोलीले १० नेपाली खेलाडी टोलीमा भित्राएका छन् ।

हरेक टोलीले आफ्नो अनुकुलका ४ विदेशी खेलाडी अनुबन्ध गर्न बाँकी छ । नेपाल क्रिकेट संघ (क्यान) को‌ आयोजनामा ८ टोलीको सहभागितामा‌ मंसिर १५ गतेदेखि पुस ६ गतेसम्म एनपिएल हुनेछ ।

विराटनगरको टिम

सन्दीप लामिछाने, लोकेश बम, प्रतिस जिशी, बसिर अहमद, राजेश पुलामी मगर, जितेन्द्रकुमार मुखिया, अनिल खरेल, दिपक बोहोरा, सुवास भन्डारी, नरेन भट्ट र मिर्नाल गुरुङ