एजेन्सी – भारतले बंगलादेशविरुद्धको ३ टि ट्वान्टी आई सिरिज एक खेल अगावै जितेको छ । दोस्रो खेलमा बुधवार बंगलादेशमाथि ८६ रनको सानदार जित निकाल्दै भारतले सिरिज जितेको हो । पहिलो खेल भारतले ७ विकेटले जितेको थियो ।

भारतको दिल्लीमा भएको खेलमा २ सय २२ रनको लक्ष्य पछ्याएको बंगलादेशले निर्धारित २० ओभरमा ९ विकेट गुमाएर १ सय ३५ रन मात्र बनाउन सक्यो ।

बंगालादेशका लागि महमुदुल्लाहले ३९ बलमा ४१, मेहेदी हसन मिराज र प्रविन हौसेनले समान १६ तथा लिटन दासले १४ रन जोडे ।

भारतका जितिशकुमार रेड्डी र वरुण चक्रवर्तीले समान २ तथा अर्शदिप सिंह, वासिटंन सुन्दर, अभिषेक शर्मा,मंयक यादव र रियान परागले समान १ विकेट लिए ।

अरुण जेट्ली क्रिकेट स्टेडियममा टस हारेर ब्याटिङको निम्ता पाएको भारतले निर्धारित २० ओभरमा ९ विकेट गुमाएर २ सय २१ रनको योगफल तयार गरेको थियो ।

घरेलु टोलीका लागि नितिशकुमार रेड्डी र रिंकु सिंहले अर्धशतक बनाएका थिए । रेड्डीले ३४ बलमा ४ चौका र ७ छक्काको सहयोगमा ७४ रन जोडे । रिंकुले २९ बलमा ५ चौका र ३ छक्काको सहयोगमा ५३ रन बनाए ।

हार्दिक पान्ड्याले १९ बलमा २ चौका र २ छक्काको सहयोगमा ३२ तथा रियान पराग र ओपनर अभिषेक शर्माले समान १५ रन बनाए ।

बंगालादेशका रिसाद हौसेनले ३ तथा तस्किन अहमद, मुस्ताफिजुर रहमान र तान्जिम हसन साकिवले समान २ विकेट लिए । दुई देशबीचको तेस्रो टि ट्वान्टी खेल शनिवार रहेको छ ।