काठमाडौं(हाम्रो खेलकुद) – अर्को महिना हुने १९औं द हङकङ क्रिकेट सिक्सेसमा बलियो नेपाली टोलीले सहभागिता जनाउने भएको छ ।

नेपालको मुख्य टोली अमेरिकामा विश्वकप लिग टुको खेलमा व्यस्त रहने हुँदा दोस्रो रोजाइको बलियो नेपाली टोली प्रतियोगिताका लागि पठाइने नेपाल क्रिकेट संघ(क्यान) का प्रवक्ता छुम्बी लामाले बताए ।

‘हाम्रो मुख्य टोली त्यस समयमा अमेरिकामा हुने विश्वकप लिग टुमा व्यस्त रहने छ । प्रतियोगितामा नेपालले दोस्रो रोजाइको भए पनि बलियो टोली पठाउने छ,’ प्रवक्ता लामाले हाम्रो खेलकुदलाई भने ‘टिम छनोटका लागि दशैं पछि नै हामी बन्द प्रशिक्षण सुरु गर्नेछौं । त्यहाँबाट प्रतियोगिताका लागि बलियो ७ सदस्यीय टोली तयार गरिनेछ ।’

द हङकङ क्रिकेट सिक्सेस आज जारी गरेको समूह विभाजनमा नेपाल, अस्ट्रेलिया र इङ्ग्ल्यान्डसँग समूहमा ‘बी’मा परेको छ । बुधवार नै प्रतियोगिताको खेल तालिका जारी भएको थियो ।

प्रतियोगितामा नेपालको पहिलो खेलमा इङ्ग्ल्यान्डसँग कात्तिक १६ गते रहेको छ । नेपालले दोस्रो खेल कात्तिक १७ मा अस्ट्रेलियासँग खेल्नेछ । हरेक समूहका शीर्ष २ टोली क्वाटरफाइनलका लागि छनोट हुनेछन् ।

प्रतियोगिताको सेमिफाइनल र फाइनल खेल कात्तिक १८ गते हुनेछ । प्रतियोगितामा १२ राष्ट्रको सहभागिता रहेको छ । सहभागी टोलीलाई ४ समूहमा विभाजन गरिएको छ ।

समूह ‘ए’ ए’ मा साविक दक्षिण अफ्रिका, न्युजिल्यान्ड र हङकङ छन्। समूह ‘सी’ मा भारत, पाकिस्तान र युएई तथा समूह ‘डी’ मा श्रीलंका, बंगलादेश र ओमान छन् ।

सन् २०१७ मा भएको प्रतियोगिताको पछिल्लो संस्करणमा पाकिस्तानलाई पराजित गर्दै दक्षिण अफ्रिका च्याम्पियन बनेको थियो । प्रतियोगिताका खेलहरुमा हरेक टोलीबाट ६ खेलाडीले प्रतिस्पर्धा गर्नेछन् ।