काठमाडौं (हाम्रो खेलकुद)- महान्यायाधिवक्ता कार्यालयले राष्ट्रिय क्रिकेट टोलीका सदस्य सन्दीप लामिछाने विरूद्धको बलात्कारको मुद्दामा पुनरावेदन नगर्ने निर्णय गरेको छ।

उच्च अदालतको फैसला चित बुझेको कारण पुनरावेदन नगर्ने निर्णय गरेको महान्यायाधिवक्ता कार्यालयका सूर्यराज दाहालले बताए।

असोज १० गते सन्दीप विरूद्धको उक्त मुद्दामा उच्च अदालतको फैसलालाई सही मान्दै पुनरावेदनमा नजाने निर्णय महान्यायाधिवक्ता कार्यालयले गरेको हो।‌ उक्त मुद्दामा सरकारी पक्षले पुनरावेदन नगर्ने निर्णय गरेपछि उच्च अदालत पाटनको फैसला यथावत रहनेछ।

सन्दीप विरूद्धको मुद्दामा गत जेठ २ गते आधार र प्रमाण नपुगेको भन्दै सफाइ दिने फैसला उच्च अदालत पाटनले गरेको थियो।

जिल्ला अदालत काठमाडौंका न्यायाधीश शिशिरराज ढकालको इजलासले गत पुस २५ गते आठ वर्ष जेल सजाय, जरिवाना, ५ लाख क्षतिपूर्ति तिराउने र गौशाला-२६ को कमजोर आर्थिक अवस्थाको फाइदा उठाएको ठहर गरेको थियो। काठमाडौं जिल्ला अदालतको सो निर्णय विरूद्ध सन्दीप उच्च अदालत पाटन गएका थिए।

गौशला-२६ लाई बलात्कार गरेको अभियोगमा सन्दीप विरूद्ध २०७९ भदौ २१ गते उजुरी परेपछि गत असोज २० गते त्रिभुवन अन्तर्राष्ट्रिय विमानस्थलबाट पक्राउ परेका थिए।

सन्दीप हाल राष्ट्रिय टोलीका साथ क्यानडामा छन्।

–त्रिभुवन अन्तर्राष्ट्रिय विमानस्थल हुनुपर्नेमा अन्यथा भएकोले सच्याइएको छ।