एजेन्सी – शुभमन गिल र रिषभ पन्तको शतक सहयोगमा भारतले बंगलादेशलाई पहिलो टेस्टको विशाल लक्ष्य दिएको छ । दुई टेस्ट सिरिजका लागि बंगलादेश टोली भारत भ्रमणमा छ ।

चेन्नईमा जारी टेस्टमा भारतले बंगलादेशलाई जितका लागि ५ सय १५ रनको लक्ष्य दिएको छ । दोस्रो इनिङमा भारतले ४ विकेटमा २ सय ८७ रन बनाउँदै इनिङ समाप्तीको घोषणा गरेको थियो ।

लक्ष्य पछ्याउदै ब्याटिङ सुरुवात गरेको बंगालादेशले शुक्रवार तेस्रो दिनको‌ समाप्तीमा ४ विकेट गुमाएर १ सय ५८ रन बनाएको छ । दुई दिनको खेल बाँकी रहँदा बंगालादेश ३ सय ५६ रनले पछि छ ।

कप्तान नजमल हसन शान्टो ५१ तथा शाकिब अल हसन ५ रन बनाउँदै नट आउट छन् । भारतका लागि पहिलो इनिङमा शतक बनाएका रविचन्द्रन आश्विनले ३ र जसप्रित बुमराहले १ विकेट लिए।

भारतका लागि दोस्रो इनिङमा गिलले नट आउट १ सय १९ रन बनाउँदा २१ महिना पछि टेस्ट टिममा पुनरागमन गरेका रिषभले १ सय ९ रन बनाए । केएल राहुल २२ रनमा नट आउट रहे ।

बंगालादेशले पहिलो इनिङमा १ सय ४९ रन मात्र बनाएपछि घरेलु टोलीले २ सय २७ रनको अग्रता बनाएको थियो । भारतले पहिलो इनिङमा ३ सय ७६ रन बनाएको थियो।