काठमाडौं(हाम्रो खेलकुद) – आइसिसी विश्वकप लिग–२ त्रिकोणात्मक ओडिआई सिरिजमा नेपालविरुद्ध ब्याटिङ गरिरहेको ओमानको आधा टिम पेभिलियन फर्किएको छ ।

ओमानका लागि पाँचौ विकेटका रुपमा प्रतिक अथाभाले आउट भएसँगै आधा टिम पेभिलियन फर्किएको हो । अथाभाले करण केसीको बलमा आउट भएका हुन् । उनले ३६ बलमा २६ रन बनाएका थिए ।

त्यसअघि चौथो विकेटका रुपमा आयान आन आउट भएका थिए । आयान ९ रन बनाउदै गुलसन झाको बलमा आउट भएका थिए ।

ओमानले तेस्रो विकेटका रुपमा ओमानका कप्तान अकिब इल्यासलाई गुमाएको थियो । इल्यास २५औं ओभरको तेस्रो बलमा गुलसन झाको बलमा करण केसीबाट समातिएका हुन् ।

इल्यास ३३ बलमा २९ रन बनाउदै आउट भएका हुन् । त्यसअघि ओमानका ओपनर कश्यप प्रजापतीलाई आरिफ शेखले भाई आसिफ शेखको हातबाट क्याच आउट गराएका हुन् । प्रजापती ५२ बलमा ३६ रन बनाउदै आउट भएका थिए ।

प्रजापतीले ओमानका अर्का ओपनर जतिन्दर सिंहसँग मिलेर ७५ रनको साझेदारी गरेका थिए । प्रजापती २०औं ओभरको दोस्रो बलमा आउट भए ।

पहिलो विकेटका रुपमा ओमानका अर्का ओपनर जतिन्दर सिंहलाई सन्दिप लामिछानेले आउट गराएका थिए । सिंह ४९ बलमा ४१ रन बनाएर आउट भए ।

सिंह १६औं ओभरको पहिलो बलमा लामिछानेको एलबिडब्लु धरापमा परेका हुन् ।

नेपालले दिएको २ सय २१ रनको लक्ष्य पछ्याई रहेको ओमानले ३५ ओभरको समाप्तीमा ५ विकेट गुमाएर १ सय ६४ रन बनाएको छ ।

ओमानका लागि खलिद कैले र सोयब खान क्रिजमा रहेका छन् ।